Jalǵan aqparat taratqan qaraǵandylyq 7 jylǵa sottalýy múmkin
QARAǴANDY. QazAqparat – Áleýmettik messendjerler arqyly jalǵan aqparat taratqan Jezqazǵan qalasynyń turǵyny jeti jylǵa deıin bas bostandyǵynan aıyrylýy múmkin, dep habarlaıdy QazAqparat tilshisi.
27 naýryzda «WhatsApp» messendjerine monıtorıng júrgizý kezinde polıtsııa qyzmetkerleri Jezqazǵan qalasynda úsh adam koronavırýsty juqtyrǵany týraly aýdıojazba taratqan áıel adam anyqtaldy.
«Bul derek shyndyqqa sáıkes kelmeıdi, QK 274-babynyń 2-bóligi boıynsha sotqa deıingi tergeý bastaldy (telekommýnıkatsııa jelilerin paıdalaný arqyly kórineý jalǵan aqparat taratý). Júrgizilgen is-sharalar nátıjesinde 32 jastaǵy qala turǵyny anyqtaldy», - dedi PD baspasóz qyzmeti.
Qaraǵandy oblysynyń polıtsııa departamenti azamattardy áleýmettik jelilerde paıda bolǵan qaýesetter men jalǵan oı-pikirlerge qulaq aspaýǵa shaqyrady. Memlekettik organdardyń resmı málimetterine ǵana negizdelý qajet. Sondaı-aq, tártip saqshylary osyndaı qylmystardy jasaǵany úshin 7 jylǵa deıin bas bostandyǵynan aıyrý jazasy kózdelgenin eske salady.
