Jalǵan aqparat pen dinı arandatýǵa qatysty qatań sharalar qabyldanady - prokýratýra
ASTANA. KAZINFORM – QR Bas prokýratýrasy azamattardy, onyń ishinde onlaın-platformalarda pikir bildirý kezinde zańnamany qatań saqtaýǵa shaqyrdy.
Vedomstvo málimetinshe, sońǵy ýaqytta jekelegen tulǵalardyń ulttyq dástúrlerge, ádet-ǵuryptarǵa jáne kópǵasyrlyq tarıhy bar Naýryz meıramyn atap ótýge qatysty teris pikirlerdi jarııa túrde taratý derekteri tirkelgen.
Atalǵan pikirler dástúrler men ádet-ǵuryptardy jalǵan dinı dogmalarmen úılespeıdi degen burmalanǵan tujyrymdarmen negizdelgen.
– Mundaı málimdemeler Qazaqstannyń zaıyrly memleket retindegi konstıtýtsııalyq qaǵıdalaryna qaıshy keledi. Sonymen qatar olar qoǵamdyq kelisimge, ultaralyq jáne dinaralyq tatýlyqqa zııan keltirýi múmkin, – dep málimdedi Bas prokýratýra.
Sondaı-aq vedomstvo jýrnalısterdiń, blogerlerdiń jáne aqparattyq alań ıeleriniń jaýapkershiligine erekshe nazar aýdardy.
– Jalǵan dinı kózqarastardy nasıhattaıtyn tulǵalarǵa kópshilik aldynda sóz berý arandatýshylyq sıpattaǵy málimdemelerdiń taralýyna yqpal etedi. Bul qoǵam sanasyna teris áser etip, genderlik teńsizdikti nasıhattap, áıelderdiń ar-namysy men qadir-qasıetin qorlaýǵa ákelýi múmkin, – delingen habarlamada.
Bas prokýratýra mass-medıa ókilderin kásibı etıkany, obektıvtilikti saqtaýǵa jáne qoǵamdyq kelisimge qaýip tóndiretin ıdeıalardy taratpaýǵa shaqyrdy.
Vedomstvo eskertkenindeı, kórineý jalǵan aqparat taratý QR Qylmystyq kodeksiniń 274-babyna sáıkes jaýaptylyqqa ákep soǵady.
Al ulttyq, dinı nemese áleýmettik alaýyzdyqty qozdyrýǵa baǵyttalǵan áreketter Qylmystyq kodekstiń 174-baby boıynsha aýyr qylmys retinde qarastyrylady.
Sondaı-aq mundaı áreketter dinı qyzmet jáne dinı birlestikter týraly zańnamany buzý retinde baǵalanyp, Ákimshilik quqyq buzýshylyq týraly kodekstiń 490-babyna sáıkes jaýapkershilikke ákelýi múmkin.
Bas prokýratýra azamattardy jalǵan aqparat taratýdan bas tartýǵa, ulttyq jáne mádenı qundylyqtarǵa qurmetpen qaraýǵa jáne qoǵamda alaýyzdyq týdyratyn málimdemelerge jol bermeýge shaqyrdy.
Quqyq qorǵaý organdary mundaı faktiler anyqtalǵan jaǵdaıda zańnamaǵa sáıkes qatań sharalar qabyldaıtynyn atap ótti.
Aıta keteıik, buǵan deıin «102»-ge jalǵan qońyraý shalǵandarǵa qandaı jaza qoldanylatyny habarlandy.
