Qazaqstanda zańǵy qaıshy kontent taratqan 9 strımer jaýapqa tartyldy
ASTANA. KAZINFORM — Qazaqstanda áleýmettik jelilerde zańǵa qaıshy kontent taratqan toǵyz strımer ákimshilik jaýapkershilikke tartyldy. Bul týraly Іshki ister mınıstrligi habarlady.
ІІM málimetinshe, keıbir áleýmettik jeli qoldanýshylary qaralym, laık jáne donat jınaý úshin shekten shyǵyp, tikeleı efırlerde balaǵat sózder aıtyp, ádepsiz áreketter kórsetip, qaýipti prankter uıymdastyrǵan.
Mysaly, Astananyń 37 jastaǵy turǵyny Indıra Eshtaeva TikTok jelisindegi tikeleı efır kezinde balaǵat sózder aıtyp, zańsyz kontent taratqan. Oǵan usaq buzaqylyq jasaǵany úshin ákimshilik aıyppul salynǵan.
Almatyda 32 jastaǵy Aqtóre Batyrbek tikeleı efır kezinde aınalasyndaǵylardy qorlap, balaǵat sózder aıtqany úshin sot sheshimimen 5 táýlikke ákimshilik qamaýǵa alynǵan.
Shymkentte 20 jastaǵy Danııar Seıdálıev aýdıtorııa nazaryn aýdarý maqsatynda efır barysynda elektroshoker qoldanyp, adam urlaý kórinisin ádeıi uıymdastyrǵan. Sonymen qatar qoǵamdyq tártipti buzǵan. Osy áreketi úshin oǵan 8 táýlik ákimshilik qamaý jazasy taǵaıyndaldy.
Jambyl oblysynda TikTok-ta «Altyn qyz» degen atpen tanylǵan 41 jastaǵy Laılo Qasymova birneshe ret balaǵat sózder aıtyp, quqyqqa qaıshy kontent taratqany úshin aıyppul arqalady.
Sondaı-aq Jambyl oblysynda 19 jastaǵy Baıbek Jarqynaı men Tanaberganov Asyljan donat jınaý jáne aýdıtorııa tartý úshin tikeleı efırde bir-birine ádeıi dene jaraqatyn salǵan. Ekeýi de ákimshilik jaýapkershilikke tartyldy.
ІІM áleýmettik jelidegi anonımdi akkaýnttardyń artynda jasyryný múmkin emes ekenin eskertti. Vedomstvo quqyq buzýshylardyń jeke basyn anyqtaýǵa múmkindik beretin quraldar bar ekenin atap ótti.
— Qoǵamdyq minez-qulyq mádenıetin buzatyn, jastarǵa teris úlgi kórsetetin jáne zorlyq-zombylyq, qorlaý arqyly tanymal bolýǵa tyrysatyn tulǵalardan tsıfrlyq keńistikti tazartý jumystary jalǵasady, — dedi ІІM resmı ókili Shyńǵys Alekeshev.
Aıta keteıik, buǵan deıin ІІM jasóspirimderge áleýmettik jelidegi qaýipsizdik erejelerin eske salǵan edi.
