Jalǵa beriletin páterdiń eń arzany - Túrkimenstanda, eń qymbaty - Qazaqstanda
ASTANA. KAZINFORM – Asia-Plus basylymy Dýshanbe, Tashkent, Bishkek, Astana jáne Ashhabadta bir, eki jáne úsh bólmeli páterlerdi jalǵa alý baǵasyn anyqtady. Osy maqsatta aǵymdaǵy jyldyń tamyz jáne qyrkúıek aılarynda jalǵa beriletin saıttarda jarııalanǵan 50 habarlandyrý zertteldi. Salystyrýǵa yńǵaıly bolý úshin baǵalar AQSh dollarymen berilgen.
Ortalyq Azııanyń astanalary arasynda eń arzan turǵyn úıdi jalǵa alý Túrkimenstan astanasy Ashhabadta tirkeldi. Onda 40 sharshy metrlik bir bólmeli páterdi ortasha eseppen 240 dollarǵa jalǵa alýǵa bolady. Ashhabadta eki bólmeli páterdi jaldaý ortasha eseppen $320, al úsh bólmeli páterdi jaldaý $410 turady.
Tájikstan astanasy Dýshanbede bir bólmeli páterdi jalǵa alýdyń ortasha baǵasy aýdan men jaǵdaıǵa baılanysty aıyna 160-360 dollar aralyǵynda. Eki bólmeli jáne úsh bólmeli páterler ortasha eseppen 500 dollardan 700 dollarǵa deıin jalǵa beriledi.
Jaldaý aqysynyń eń joǵary baǵasy Qazaqstannyń astanasy Astana men Qyrǵyzstan astanasy Bishkekte. Munda bir bólmeli páterdiń ortasha jaldaý aqysy 440-520 dollar, eki bólmeli páter 670-1520 dollar, úsh bólmeli páter 1140-2130 dollar aralyǵynda.
Tashkenttegi jalǵa alý baǵasy Bishkektegige jaqyn. Munda bir bólmeli páterdi jaldaýdyń ortasha baǵasy aýdan men jaǵdaıǵa baılanysty 420 dollar, eki bólmeli páter 700 dollar, úsh bólmeli páter 1000 dollardy quraıdy.
Zertteý nátıjeleri boıynsha, Ortalyq Azııanyń barlyq elderinde baıqalǵan jalǵa alý baǵasynyń ósýi, eń aldymen, turǵyndar men qonaqtar tarapynan suranystyń artýy jáne oqý jylynyń bastalýymen baılanysty ekeni aıtyldy.
