Jalǵa berilgen jerlerdiń jaǵdaıy - jiti qadaǵalaýda
ÓSKEMEN. QazAqparat - Shyǵys Qazaqstan oblysy ákiminiń orynbasary Dúısenǵazy Mýsınniń tóraǵalyǵymen ótken selektorlyq keńeste aımaqtaǵy aýyl sharýashylyq jerlerin tıimdi paıdalaný máselesi sóz boldy. Onlaın rejımde ótken keńes jumysyna birqatar oblystyq basqarma basshylary men aýdan-qala ákimderi, olardyń orynbasarlary qatysyp otyrdy, dep habarlaıdy «Dıdar» gazetinen.
Jıynda oblystyq jer qatynastary basqarmasynyń basshysy Vıktorııa Barsýkova sheteldikterge jalǵa berilgen aýyl sharýashylyq jerleri jaıynda málimet berdi. Onyń aıtýynsha, búginde ózge elderdiń azamattaryna ýaqytsha paıdalanýǵa berilgen jer telimderiniń eń kóp mólsheri Besqaraǵaı aýdanynda tirkelýde.
- Aýdandyq ákimdiktiń málimeti boıynsha Besqaraǵaıda aýyl sharýashylyq maqsattaǵy jerlerdi jalǵa alyp otyrǵan bir sheteldik kompanııa bar. Ol - qytaılyq «Long xin» («Lýn Sın») jaýapkershiligi shekteýli seriktestigi. Halyqaralyq saýda kompanııasy degen mártebege ıe seriktestik oblys kóleminde tórt jer telimin jalǵa alyp otyr. Olardyń jalpy aýmaǵy 14 754 gektardy (egistik jerler - 8 778, onyń ishindegi 990 gektary - sýarmaly, 5 943 gektary - jaıylym) quraýda. Atalmysh jerler sheteldikterge aýdandyq ákimdik arqyly 2015 jyly qazirgi zańnama aıasynda berilgen bolatyn, - dedi basqarma basshysy.
Óz kezeginde oblystyq jerdiń paıdalanylýy men qorǵalýyn qadaǵalaý basqarmasynyń basshysy Serikjan Jaqaev sońǵy tekseristerdiń nátıjesi boıynsha Besqaraǵaı aýdanynda birqatar zańbuzýshylyq tirkelgenin habarlady. Atap aıtqanda, joǵaryda aty atalǵan «Long xin» seriktestiginiń ózderine senip tapsyrylǵan jerlerdi tıimsiz paıdalaný faktisi anyqtalǵan.
- Tekserister barysynda jalǵa alýshylar eki ýchaskedegi jerdi maqsatsyz paıdalanǵany belgili boldy. Naqtyraq aıtsaq, jaıylymǵa berilgen 4 186 gektar jer jyrtylǵan. Sonymen qatar, memleket ıeligindegi 88 gektar jerdi zańsyz ıelený deregi anyqtalǵan. Osyǵan baılanysty Qazaqstan Respýblıkasy Jer kodeksiniń 164-1 baby negizinde materıaldar Besqaraǵaı aýdanynyń ákimdigine joldandy. Jalpy alǵanda, «Long xin» seriktestigine qatysty toǵyz ákimshilik is qozǵalyp, bir mıllıon 379 myń teńge kóleminde aıyppul salyndy. Búginde atalmysh aıyppul tolyǵymen óteldi. Sondaı-aq, úsh aıdyń ishinde anyqtalǵan zańbuzýshylyqtardy joıý jóninde uıǵarymdama joldandy, - dedi Serikjan Jaqaev.
Sonymen qatar, jıynda oblysymyzdyń Ulan jáne Zyrıan aýdandarynda da sheteldik azamattarǵa jalǵa berilgen jer telimderi bar ekeni belgili boldy. Degenmen, atalmysh jalǵa alaýshylarǵa (ekeýi de Reseı Federatsııasynyń azamaty) qatysty eshqandaı zańbuzýshylyq tirkelmepti.
Oblystyq jerdiń paıdalanylýy men qorǵalýyn qadaǵalaý basqarmasynyń basshysy Serikjan Jaqaevtyń málimetinshe, ústimizdegi jyly elimizdiń Jer resýrstaryn basqarý komıteti júrgizgen keshendi tekserister barysynda Úrjar aýdanynda birqatar jer teliminiń qajetti konkýrstarsyz berilgeni de anyqtalypty. Dálirek aıtsaq, «Bátýa», «Mánfaǵat» jáne «Yrǵyn» JShS-teri eshqandaı konkýrs ótkizbeı-aq, jalpy aýmaǵy 87 432 gektar jerge ıe bolǵan kórinedi. 2015 jyly oblystyq basqarma júrgizgen tekserý jumystary kezinde atalmysh seriktestikterge berilgen jer telimderi uzaq ýaqyt paıdalanylmaı jatqany anyqtalǵan.
Bul máselege selektorlyq keńes barysynda oblys ákiminiń orynbasary Dúısenǵazy Mýsın erekshe toqtaldy.
- Memleket tarapynan egin egip, mal ósiremin deýshilerge bar jaǵdaı jasalýda. El bıýdjetinen kásipkerlerdi qoldaý maqsatyna qomaqty mólsherde sýbsıdııa tólenip keledi. Mine, osyndaı kómekke qaramastan aýdandarda áli de paıdalanylmaı jatqan jerler jeterlik. Sol sebepti budan bylaı aýdandar men qalalardaǵy jer máseleleri jónindegi komıssııalar atalmysh jaıtqa jiti mán berýi kerek dep sanaımyn. Zań bárine ortaq, eshkimge jeńildik jasalmaýy tıis. Al endi sheteldikterge jalǵa berilgen jerlerge qatysty máselege keletin bolsaq, bul turǵyda anyqtalǵan zańbuzýshylyqtyń bári joıylǵan, aıyppul tólenip, ister jabylǵan. Sondyqtan bázbireýlerdiń sózine erip, qaýeset taratyp, eldi dúrliktirýdiń esh negizi joq. Qazir joǵaryda aıtylǵandaı sheteldik jalǵa alýshylar tek Besqaraǵaı, Ulan jáne Zyrıan aýdandarynda ǵana bar. Ózge óńirlerde ondaı sheteldik jer paıdalanýshylar joq. Al bar bolsa, bul jóninde bizge ýaqtyly habarlamaı, derekti jasyryp qalýǵa tyrysqan jergilikti jerdegi bılik ókilderi jaýap beretin bolady, - degen oblys ákiminiń orynbasary, sonymen qatar, jerdi maqsatty nemese tıimsiz paıdalanǵan sheteldikterge endi eshqandaı keshirim bolmaıtynyn eskertti. Sondaı-aq, keńeste Dúısenǵazy Mýsın qaralǵan máselelerge qatysty basqarma basshylary men aýdan ákimderine tıisti tapsyrmalar berip, jaqyn arada atqarylǵan jumys qorytyndysy boıynsha oblys ákimine esep beretinin málimdedi.
Nurjan Kenjeuly
