Jalǵa beriletin baspananyń erejeleri qandaı?

ASTANA. QazAqparat - Jalǵa beriletin baspananyń erejeleri qandaı? Búgin Májiliste «Nurly jol» baǵdarlamasyn iske asyrý sheńberinde jalǵa beriletin turǵyn úı qurylysynyń barysy men turǵyn úı ınfraqurylymyn nyǵaıtý sharalary taqyrybyndaǵy dóńgelek ústelde «Báıterek» Ulttyq basqarýshy holdıngi» AQ Basqarma Tóraǵasynyń orynbasary Lıazzat Ibragımova osy máseleni túsindirdi.

Baıandama barysynda L.Ibragımova jalǵa beriletin turǵyn úılerdiń erejelerine toqtalyp ótti. «Jalǵa alýdyń eki sanaty qarastyrylǵan: birinshi - satyp alynatyn jalǵa beriletin baspana, ekinshi - satyp alý quqyǵynsyz jalǵa alý. Ekinshi sanattaǵylar baspanany satyp ala almaıdy. Al satyp alýǵa bolatyn baspanany jalǵa alýdyń merzimi 20 jylǵa deıin begilenedi, bastapqy jarna tólemderin engizýdiń qajeti joq. Merziminen buryn satyp alý sharttary da qarastyrylǵan. Merziminen buryn satyp alýdy tek 5 jyldan soń ǵana júzege asyrýǵa bolady. Sonymen qatar, múlikti ustaýǵa qatysty tólemder, sonyń ishinde múlik salyǵy, kommýnaldyq jáne basqa da shyǵystar jalǵa alýshy esebinen tólenedi», - dedi L. Ibragımova. Onyń aıtýynsha, ótken jyly osy sanattaǵylar tarapynan úsh aıda bir ret múlik salyǵynyń tólengeni týraly shaǵymdar kóp bolǵan. Osyǵan oraı, zańnamaǵa ózgerister engizilip, bul salyq on esege tómendetilgen. Satyp alynatyn jalǵa beriletin baspananyń jalpy aýmaǵy 80 sharshy metrden aspaýy kerek. Ony qaıta jalǵa berýge, satýǵa, syılaýǵa tyıym salynady.

 «2 bólmeli páterdi mysal retinde alaıyq. Eger siz satyp alynatyn jalǵa beriletin baspanaǵa ıe bolsańyz, Astana men Almaty qalalardyń naryǵynda bundaı úılerdiń sharshy metriniń jalǵa berý baǵasy 1120 teńge bolsa, onda bizdiń jalǵa alýshy 80 sharshy metrdi quraıtyn eki bólmeli páteri úshin shamamen aıyna 56 myń teńge tóleıdi. Basqa óńirler úshin árıne tólemder sáıkesinshe arzandaý keledi», - deıdi «Báıterek» holdınginiń ókili.

Onyń aıtýynsha, ekinshi sanattaǵy, ıaǵnı satyp alý quqyǵynsyz jalǵa alynatyn baspanalar negizinen satyp alynatyn jalǵa beriletin baspanaǵa tóleý qabileti tómen azamattarǵa arnalady. «Bulardyń aı saıyn tóleıtin tólemderi de eki esege az bolady, máselen Astana men Almaty qalalarynda bul shamamen 28 myń teńge bolady. Satyp alý quqyǵynsyz jalǵa alynatyn baspananyń merzimi 10 jylǵa deıin, ony keıinnen taǵy da 5 jylǵa uzartý sharttary kórsetiledi. Eń bastysy bul baspanalar negizinen ózderi úı satyp alýǵa múmkindigi tómen azamattarǵa beriledi», - dedi L. Ibragımova.