Jalǵa beriletin baspana naryǵynyń basym bóligi kóleńkede qalyp otyr - depýtat
«Sońǵy kúnderi el ishinde jalǵa alynatyn baspana tapshylyǵy men bul naryqtaǵy baǵanyń sharyqtaýy kóp talqylanyp jatyr. Qazirgi kezde jalǵa beriletin baspana naryǵynyń basym bóligi «kóleńkede» qalyp otyr», - dedi E. Smyshlıaeva Qarjy mınıstriniń atyna joldaǵan saýalynda.
Onyń aıtýynsha, baspanasy joq adamdar páterdi jalǵa alsa, onda tıisti kelisimshartty rásimdeý sırek kezdesedi.
Sonymen qatar depýtat turǵyn úıdi jalǵa berý bıznesin «kóleńkeden» shyǵarý ahýaly áli de ózgermeı jatqanyn, al qazirgi kezde osy naryqtaǵy suranys saladaǵy problemany aıqyn kórsetip otyrǵanyn aıtty.
«Tez arada paıda tabý maqsatynda spekýlıatsııa men turǵyndardy páterden shyǵarý oqıǵalary bolyp jatyr. Bul turǵyda jalǵa alatyn adamdar jaǵdaıda qorǵaýsyz qalady, sebebi olardyń kóbi tıisti kelisimshartty rásimdemegen», - dedi E. Smyshlıaeva.
Onyń paıymynsha, jalǵa alý naryǵynda qoldanystaǵy retteý tetikterin ákimshilendirýdi kúsheıtý kerek. Sonymen qatar zańsyz áreketterge jol berip júrgenderdi kóleńkeden shyǵarý úshin tıisti sharalar qabyldaý mańyzdy bolyp tur. Osy oraıda baspanany jalǵa beretinderge resmı túrde jumys isteý tıimdi bolatyndaı sheshimder jasaý kerek.
