Jaldamaly páter alǵysy keletin jastar qandaı qujattardy ótkizýi kerek

NUR-SULTAN. QazAqparat – Nur-Sultan, Almaty men Shymkent qalalarynyń jastary jaldamaly páterge ıe bolýy úshin qandaı qujattardy ótkizýi tıis? Tolyqqandy qujattar tizimin Ortalyq kommýnıkatsııalar qyzmetinde ótken baspasóz máslıhatynda QR Aqparat jáne qoǵamdyq damý mınıstrligi Jastar jáne otbasy isteri komıtetiniń tóraǵasy Madııar Qojahmet aıtyp berdi, dep habarlaıdy QazAqparat tilshisi.

«Erejege sáıkes, ótinish qabyldaý bastalǵannan keıin úmitkerler mynadaı qujattardy tapsyrýy kerek: ótinish, jeke basyn kýálandyratyn qujattyń kóshirmesi, bilimi týraly qujattyń kóshirmesi, neke qııý týraly qujattyń kóshirmesi (bar bolǵan jaǵdaıda), balalarynyń týýy týraly kýáliktiń kóshirmesi (bar bolǵan jaǵdaıda), ótinish berýshige jáne otbasynyń barlyq múshelerine jyljymaıtyn múliktiń bar-joǵy týraly anyqtama, jumys ornynan anyqtama, ótinish berýshiniń bank shotynyń bolýy jáne onyń nómiri týraly anyqtama, bank shoty boıynsha aqshanyń qaldyǵy men aı saıynǵy aınalymy týraly úzindi, ótinish berýshiniń túrli qyzmet salasyndaǵy jetistikterin rastaıtyn qujattar (bar bolǵan jaǵdaıda)», - dedi Madııar Qojahmet.

Qujattar qabyldanǵannan keıin ýákiletti organ onyń bárin tekserip, tolyqtyǵy men sáıkestigin qaraıdy.
«Osydan keıin upaılarǵa sáıkes sanaq júrgizilip, jaldamaly páter beriletin jastardyń tizimi bekitiledi. Bul tizimge upaılardy esepteý kezinde ótinish berýshiniń kásibi, otbasylyq jaǵdaıy, jeke kásipkerlik qyzmeti, bıýdjettik qyzmetterde jumys isteýi, shottarynyń jınaqtary eskeriledi. Baldary teń jaǵdaıda ótinishti birinshi tapsyrǵan jastarǵa basymdyq beriledi. Sonymen birge, negizgi talaptardyń biri – jastar tabysy 40 AEK-ten tómen bolmaýy kerek. Mysaly, jaldamaly páter úshin jas jigit 10-12 myń, oǵan qosymsha kommýnaldyq shyǵyndar úshin taǵy 10-15 myń teńge tóledi delik. Onyń aılyǵy 110 myń teńge bolsa, ıaǵnı, ol jalaqysynyń jartysynyń jartysyn bankte bastapqa jarna retinde jınaı alady», - dedi ol.

Atalmysh baǵdarlama boıynsha bıyl Nur-Sultanda - 1050 páter, Almatyda - 1050 páter, Shymkentte - 904 páter beriledi. Ýákiletti organ satyp alý quqyǵynsyz jalǵa beriletin turǵyn úıdi berý týraly sheshim qabyldaǵan soń 15 kúntizbelik kún ishinde turǵyn úıdi jaldaý týraly shart jasalady.
Eske sala ketsek, byltyr Jastar jylynyń ashylýyna arnalǵan saltanatty jıynda Elbasy Nursultan Nazarbaev Astana, Almaty jáne Shymkent qalalarynda jastar úshin jylyna 1 myń páter salynatynyn málim etken bolatyn.
Al byltyr kúzde Úkimettiń keńeıtilgen otyrysynda sol tustaǵy Indýstrııa jáne ınfraqurylymdyq damý mınıstri Jeńis Qasymbek (qazir - Premer-mınıstrdiń orynbasary) Astana, Almaty, Shymkent jumysshy jastaryna 1 myń páter salý mamyrda bastalatynyn habarlaǵan edi.