Jaldamaly páterde esirtki saqtaǵan qyzylordalyq 8 jylǵa sottaldy
QYZYLORDA. KAZINFORM — Qyzylorda oblysynda asa iri mólsherdegi psıhotroptyq zattardy ótkizgen turǵyn qylmystyq jaýapkershilikke tartyldy. Bul týraly oblystyq polıtsııa departamentinen habarlady.
Ótken jyldyń jazynda polıtseıler qoǵamdyq qaýipsizdik pen azamattardyń densaýlyǵyna eleýli qater tóndiretin sıntetıkalyq esirtki zattaryn ótkizgen 30 jastaǵy qala turǵynyn ustaǵan bolatyn. Osylaısha esirtkini jetkizý arnasy joıyldy.
— Qala ortalyǵyndaǵy jalǵa alynǵan páterdi tekserý jáne tintý barysynda zańsyz aınalymnan edáýir kóp mólsherdegi, ıaǵnı 110 paketke salynǵan sıntetıkalyq esirtki alyndy. Saraptama qorytyndysyna sáıkes ol jalpy salmaǵy 489,21 gramm «a-pırrolıdınovalerofenen» nemese «a-PVP» psıhotroptyq zattary bolyp shyqty. Ustalǵan adamǵa qatysty qylmystyq is qozǵaldy, sotqa deıingi tergep-tekserý áreketi júrgizildi. Tergeý barysynda kúdikti sot sheshimin kútip, qamaýda boldy. Sot sheshimimen aıyptalýshy asa iri mólsherde psıhotroptyq zattardy ótkizý maqsatynda zańsyz satyp alǵany, saqtaǵany úshin kináli dep tanyldy. Sot oǵan 8 jyl merzimge bas bostandyǵynan aıyrý jazasyn taǵaıyndady, — delingen habarlamada.
Sottalýshy jazasyn qylmystyq atqarý júıesi mekemesinde óteıdi. Úkim zańdy kúshine endi.
Buǵan deıin Taraz qalasynda polıtsııa qyzmetkerleri júrgizgen jedel-izdestirý sharalary barysynda esirtkiniń zańsyz aınalymyna qatysy bar degen kúdikpen 43 jastaǵy azamat ustaldy.
