Jalaqysynyń 50 paıyzyn ǵana alyp otyrǵandar 42 500 teńgege ótinim bere ala ma

NUR-SULTAN. QazAqparat - Jumys berýshisi jalaqysynyń 50 paıyzyn ǵana tólep otyrǵan qyzmetkerler 42 500 teńgege ótinim bere almaıdy. Bul týraly Ortalyq kommýnıkatsııalar qyzmetindegi brıfıngide QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

Brıfıng barysynda BAQ ókilderi mınıstrden «jumys berýshisi jalaqysynyń 50 paıyzyn ǵana tólep otyrǵan qyzmetkerler 42 500 teńgege ótinim bere ala ma?» dep suraǵan edi.

«Bul 42 500 teńge áleýmettik tólem jalaqysynan aıyrylǵandarǵa ǵana beriledi. Sondyqtan jalaqy mólsheri tómendegen jaǵdaıda áleýmettik tólem berilmeıdi. ıAǵnı, birde-bir tıyn tólenbeıtin aqysyz demalysqa jiberilgen jaǵdaıda ǵana 42 500 teńge alýǵa quqyǵyńyz bolady jáne ótinish bere alasyzdar», - dep jaýap berdi mınıstr.

Sonymen qatar, ol áleýmettik tólemdi zańsyz alǵandar qarajatty qashan qaıtarýy kerekitigin de atap ótti.

«Qaı ýaqytta qaıtarǵyńyz kelse, sol ýaqytta qaıtara alasyzdar. Onyń merzimi de, qaıtarý tártibi de joq. Eger siz qateleskenińizdi kórip turyp qaıtaramyn deseńiz, ony jaǵdaıyńyz kelgen kezde qaıtaryńyz. Qaıtarmaımyn deseńiz qaıtarmaısyz», - dedi Birjan Nurymbetov.