Jalaqynyń kóterilýi qyzmetkerlerdi jaqsy, ári sapaly jumys isteýge yntalandyrady - dáriger J.Isa
ALMATY. 5 shilde. QazAqparat /Ádilet Musahaev/ - Dárigerlerdiń jalaqysyn kóterilýi óte qýantarlyq jaǵdaı.
Jalpy aldaǵy ýaqytta medıtsına salasyndaǵy qyzmetkerlerdiń eńbekaqysy basqa maman ıelerimen teńesse degen tilegimiz bar. Bul jaıynda Almaty qalalyq salaýatty ómir saltyn qalyptastyrý ortalyǵynyń kommýnıkatsııa jáne salaýatty ómir saltyn nasıhattaý bóliminiń meńgerýshisi, dáriger -epıdemıolog Janna Isa QazAqparat tilshisimen suhbattasý barysynda aıtty.
Elbasy óziniń jyl saıynǵy halyqqa Joldaýynda salaýatty ómir saltyna óte úlken kóńil bóledi. Onyń ishinde aýrýdyń aldyn alý isterin keńinen qolǵa alýdy meńzeıdi. Janna Isa osy mindet jolynda qyzmet etip jatqan jandardyń qatarynda. Ol halyqty salaýatty ómir saltyn saqtaýǵa shaqyryp, árdaıym túrli sharalar ótkizip turady.
«Eýropa elderinde aýrýdyń aldyn alý jumystaryna óte kóp kóńil bóledi, ári oǵan qarjynyń kóp bóligin aýdarady. Naýqasty emdegennen góri onyń aldyn alǵan óte tıimdi. Óıtkeni qazir dári-dármek, túrli apparattar óte qymbat», -deıdi J.Isa.
Onyń aıtýynsha, adam densaýlyǵynyń 55 paıyzy óziniń ómir súrý saltyna baılanysty, al 10 paıyzyna medıtsına jaýapty eken. «Eger adam temeki, alkagoldi ishimdikter sııaqty zııandy áreketterden aýlaq bolyp, sportpen aınalysyp óz densaýlyǵyn kúte bilse, onyń bári naqty nátıjesin beredi», -dep atap ótti óz sózinde dáriger.
Sondaı-aq ol alty jyl bilim alyp, jumysqa ornalasqanda jalaqynyń azdyǵynan kóptegen túlekter basqa salaǵa eriksiz aýysyp ketetindigin aıtady.
«Qazirgi naryq zamanynda qyzmetkerlerge jalaqynyń mólsheri óte qatty áser etedi. Osy tustaǵy Úkimettiń memlekettik qyzmetkerlerdiń jalaqysyn kótergeni óte oryndy boldy. Óıtkeni, mundaı jaǵdaı qyzmetkerlerdiń aldaǵy ýaqytta jaqsy, sapaly jumys isteýine jigerlendiredi. Bizde jaqsy jumys istegen mamanǵa syıaqy beretin 310-shy buıryq bar. Mine bul da dárigerdiń jaqsy jumys isteýine járdemdesedi», -deıdi ol.
