Jalaqynyń azdyǵynan til oqytatyn maman tappaı qalamyz – basqarma basshysy
«Barlyǵy jalaqyǵa kelip tireledi. Máselen, bizdiń Til ortalyǵynda qazaq, orys, aǵylshyn tilin úıretetin muǵalimder 56-60 myń teńge kóleminde ǵana jalaqy alady. Olarǵa mektep muǵalimderine sııaqty qosymsha saǵattar qarastyrylmaǵan. Alatyn sol bir ǵana aılyqtary. Osy sebepti bizge kadr turaqtamaıdy», - dedi Almaty oblysynyń Tilderdi damytý jónindegi basqarma basshysy Bolat Kerimbek.
Basqarma basshysynyń sózinshe, qazir oblysta tilderdi úıretetin 72 maman bar.
«Almaty oblysynda zamanaýı úlgidegi materıaldyq-tehnıkalyq bazamen qamtamamyz etilgen «Til» oqý-ádistemelik ortalyǵy jumys isteıdi. Onyń 19-y aýdandyq jáne qalalyq, barlyǵy 20 oqytý ortalyǵy bar. Biraq jalaqynyń azdyǵy saldarynan til oqytatyn maman tappaı qalamyz. Negizinde, Til ortalyǵyndaǵy jalaqy máselesi tek Almaty oblysynda ǵana emes, ózge oblystarǵa da tán másele. Sondyqtan bul túıitkil, joǵary jaqta qaralýy tıis», - dedi Bolat Kerimbek.
Aıta keteıik, búgin Almaty oblystyq máslıhatynyń «din, til, etnosaralyq qatynastar, ishki jáne jastar saıasaty máseleleri» jáne «ındýstrııalyq-ınnovatsııalyq, kólik-logıstıkalyq damý, shaǵyn jáne orta bıznesti, týrızm men sportty qoldaý máseleleri boıynsha» komıssııalarynyń birlesken otyrysy ótti. Basqosýda basqarma basshylary 10 aıda atqarylǵan jumystardy baıandap, aldaǵy josparlarymen bólisti.
Til máselesin qaraıtyn arnaıy komıssııa qaýly bekitip, oblystyq Tilderdi damytý basqarmasyna kadr turaqsyzdyǵy máselesin sheshý boıynsha atqarylyp jatqan jumystardy keler jyldyń 1 sáýirine deıin tapsyrýdy júktedi.
