Jalaqylaryna saı jumys istemeı otyr: Saparbaev «Taraz» ÁKK qyzmetin synady
TARAZ. QazAqparat – Jambyl oblysynyń ákimdiginde Berdibek Saparbaevtyń tóraǵalyǵymen ótken keńeste «Taraz» áleýmettik-kásipkerlik korporatsııasy» AQ-nyń qyzmeti qaraldy. QazAqparat bul týraly óńir ákimdiginiń resmı saıtyna silteme jasap habarlaıdy.
«Taraz» ÁKK Basqarma tóraǵasy Núrken Shárbıevtiń aıtýynsha, korporatsııa óz qyzmetin negizgi úsh baǵyt boıynsha júrgizedi. Ol - perspektıvaly jáne básekege qabiletti ınvestıtsııalyq jobalardy iske asyrý, oblysy turǵyndarynyń ál-aýqatyn arttyrý jáne óńirlik azyq-túlik qaýipsizdigin qamtamasyz etý baǵyttary. ÁKK qurylǵannan beri 44 mıllıard teńgeden astam qarjyny quraıtyn 69 joba júzege asyrylǵan.
Búginde óńirde azyq-túlik qaýipsizdigin qamtamasyz etý maqsatynda turaqtandyrý qory jumys isteıdi. Onda un, kúrish, qaraqumyq, qant, sábiz, pııaz, ósimdik maıy, jumyrtqa jáne ózge de osy sekildi ónimder saqtalýda. Qordaǵy bul ónimder iri saýda núktelerinen basqa kommýnaldyq bazarlar men áleýmettik dúńgirshekterde de satylýda.
«ÁKK qyzmeti óńirdiń áleýmettik-ekonomıkalyq damýy úshin erekshe mańyzǵa ıe. Sondyqtan ol tıimdi jáne nátıjeli uıymdastyrylýy tıis. Ókinishke oraı, ondaı qarqyn baıqalmaıdy», - dep atap ótti oblys ákimi.
Sondaı-aq, B.Saparbaev korporatsııa oryn alyp jatqan ekonomıkalyq úderister men syn-qaterlerge, naryqtyq qatynastardyń aǵymyna jáne tutynýshylyq qajettilikterge naqyt jaýap berýde belsendilik tanyta almaı otyrǵandyǵyna nazar aýdartty. Óńirge ınvestıtsııa tartý, bıznes-bastamalardy qoldaý boıynsha da tıisti jumystardyń álsizdigine kóńil bóldi.
«Siz aýyl turǵyndarynyń turmystyq tabysyn arttyrý jónindegi pılottyq jobany uıymdastyrýshylardyń biri bolyp tabylasyz. Úkimet bul maqsatqa tıisti qarajatty bóldi. Alaıda, aýyldyqtar osy aqshany tez jáne tıimdi ıgerý isinde sizderdiń taraptan tıisti kómek oıdaǵydaı kórsetilmegen. Júktelgen mindetti qyzmetkerlerińiz sońǵy ýaqytqa deıin irkilispen áreń oryndady», - dedi B. Saparbaev korporatsııa basshylyǵynyń jumysyn synǵa alyp.
Óńir basshysy basqa da baǵyttar boıynsha jumystardyń júıesizdigin alǵa tartty. Atap aıtqanda, ÁKK basshylyǵy tarapynan turaqtandyrý qorynyń ónimderin satýda tıisti baqylaýdyń joqtyǵyn, áleýmettik pavılondardyń jumysy durys jolǵa qoıylmaǵandyǵyn, olardyń kópshiligi demalys kúnderi jabyq turatyndyǵyn basa aıtty.
Basqosýda oblys ákiminiń orynbasary Nurjan Kalenderovke «Taraz «ÁKK« AQ Dırektorlar keńesiniń tóraǵasy retinde salalyq vedomstvonyń 2019 jylǵy qarjy-sharýashylyq qyzmetine taldaý jasaý, onyń qurylymy men shtattyq kestesin qaıta qaraý tapsyryldy.
«ÁKK-niń shtattyq sany 60 adamdy quraıdy. Jalaqylary qomaqty. Alaıda, olar oǵan saı jumys istep otyr dep aıta almaımyz. Departamentter arasyndaǵy ózara qarym-qatynasty naqty úılestirý joq», - dep túıindedi B. Saparbaev.
