Jalaqy tólemegen «Munaı Servıs Aqtóbe» kompanııasynyń múlki satylyp jatyr
AQTÓBE. QazAqparat - Jyl basynan beri Aqtóbedegi óndiris oryndarynda 12 adam qaza boldy, dep habarlaıdy QazAqparat tilshisi.
Aqtóbe oblystyq eńbek ınspektsııasy bıyl 600-den astam tekserý júrgizip, 16 mıllıon teńgege ákimshilik aıyppul saldy. Jumys berýshiler eńbek qatynastary talaptaryn saqtamaǵany, eńbek qaýipsizdigi máselelerin eskermegeni anyqtaldy.
«Jumysshylardyń kóbi ýaqytyly jalaqy ala almaǵan kezde shaǵym túsiredi. Narazylyq aktsııalary bolǵan joq. Degenmen, munaı kompanııalarynda, shaǵyn bızneste eńbekaqyny keshiktirý jaǵdaılary tirkeldi. Máselen, Qudaıbergen Jubanov atyndaǵy Aqtóbe óńirlik memlekettik ýnıversıtetiniń rektoryna qatysty birneshe shaǵym tústi. Keıbiri jumystan negizsiz shyǵarylǵanyn, ekinshisi jalaqy máselesimen keldi. Sonymen qatar, túsindirý jumystarynan soń «Munaı Servıs Aqtóbe» JShS jumysshylaryna qaryzyn qaıtaryp jatyr. Áli de 2,9 mıllıon teńge qaryz. Kompanııanyń ústinen qylmystyq is qozǵalyp, sot oryndaýshylary múlikti satýǵa shyǵardy. Aqsha eńbekaqy qaryzyn óteýge jumsalady»,- dedi Aqtóbe oblystyq eńbek ınspektsııasy basshysynyń orynbasary Baýyrjan Orazaev.
Aıta keteıik, Aqtóbede óndiristik jaraqat artyp keledi. Jyl basynan beri 71 adam jumys ornynda zardap shekti. Olardyń 12-i qaza boldy. Jazataıym jaǵdaılar kóbine taý ken salasynda jáne munaı, qurylys kompanııalarynda jıi tirkeledi. Bıyl Hromtaý aýdanyndaǵy Dóń ken baıytý kombınatynda 5 adam qaza boldy. Barlyǵy 6 qylmystyq is tirkelip, qazir eki is sotqa joldandy.
