Jalaqy boıynsha aktiler mindetti túrde Memlekettik qyzmet isteri agenttigimen kelisiledi
Búgin palata otyrysynda birinshi oqylymda talqylanǵan «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasy eki oqylymda qaralyp, qabyldandy.
«Memlekettik organdarda jumys kestesiniń durys saqtalýyn baqylaýdy júzege asyrý qarastyrylyp otyr. Aqpan aıynda «Ákimshilik quqyq buzýshylyq týraly» Kodekske túzetýler engizilip, memlekettik organdarda jumys kestesin zańsyz buzý týraly ákimshilik isterdi qaraý Agenttikke berildi. Buryn mundaı isterdi ákimdikterdiń eńbek ınspektsııasy qaraıtyn. Atalǵan túzetý 1 sáýirden bastap qoldanysqa engiziledi. Osy oraıda «Memlekettik qyzmet týraly» Zańda Agenttike memlekettik organdarda jumys kestesiniń durys saqtalýyn baqylaý fýnktsııasy bekitiledi», - dedi D. Jazyqbaev.
Sonymen qatar ol memlekettik qyzmetshilerdiń eńbekaqysy salasyndaǵy aktilerdi Agenttikpen kelisýge qatysty túsinik berdi.
«Qoldanystaǵy zańǵa sáıkes, memlekettik qyzmetshilerdiń eńbekaqysy júıesin jáne olarǵa syıaqy tóleý tártibin Úkimet bekitedi. Ony ázirleıtin – Ulttyq ekonomıka mınıstrligi. Memlekettik qyzmetshilerdi yntalandyrý salasynda biryńǵaı saıasatty ustaný maqsatynda, eńbekaqy salasyndaǵy aktilerdi mindetti túrde Agenttikpen kelisý usynylyp otyr», - dedi vedomstvo basshysy.
Budan buryn habarlanǵandaı, agenttik basshysy basqa óńirge aýysqan memlekettik qyzmetshilerge rotatsııalyq tólem beriletinin, bul qarajat páter jaldaýǵa baǵyttalatynyn aıtty.
Sonymen qatar, memlekettik qyzmette qashyqtan jumys isteý jáne ıkemdi jumys kestesin retteý quzyretin agenttikke berý qarastyrylǵan.
Memlekettik basqarý akademııasy túlekteriniń mindetti jumys óteý tártibine ózgerister engizilmek.
Budan bólek, QR Memlekettik qyzmet isteri agenttigine memlekettik qyzmet pen kadr saıasatynyń tıimdiligin arttyrýǵa baǵyttalǵan birqatar ókilettik berilmek.
