Jalaqy boıynsha 4 mlrd. 779 mln. teńge qaryzdyń 3 mlrd. 700 mln. teńge bereshegi ótken jyly Eńbek ınspektsııasynyń kómegimen berildi

Bul týraly búgin baspasóz máslıhatynda Eńbek jáne halyqty áleýmettik qorǵaý mınıstrliginiń Baqylaý jáne áleýmettik qorǵaý komıtetiniń tóraǵasy Serikqalı Bısaqaev málim etti.

Jalaqy boıynsha eń úlken bereshek somalary Almaty qalasynda (352,8 mln. teńge), Almaty (336,3 mln. teńge) jáne Ońtústik Qazaqstan (79,6 mln. teńge) oblystarynyń kásiporyndarynda tirkelgen. Óńirlerdegi daǵdarysqa qarsy shtabtardyń derekteri boıynsha 2013 jylǵy 1 qańtarǵa Atyraý jáne Pavlodar oblystary kásiporyndarynda jalaqy boıynsha bereshek joq.

«QR Eńbek jáne halyqty áleýmettik qorǵaý mınıstrligi memlekettik eńbek ınspektsııasy 2012 jyly 17246 mekemeni tekserdi. Tekseris kezinde 724 mekemeniń qyzmetkerler aldyndaǵy 4 mlrd. 779 mln. teńge qaryzdary anyqtalyp, sonyń 3 mlrd. 700 mln. teńge bereshegi eńbek ınspektsııasynyń kómegimen 2012 jyldyń ishinde berildi. Anyqtalǵan kemshilikterdi joıý úshin memlekettik eńbek ınspektorlary jumys berýshilerge 917 nusqama berip, jalpy somasy 71,6 mln. teńgeni quraıtyn 861 ákimshilik is qozǵaldy», - dep atap kórsetti komıtet basshysy.

Onyń aıtýynsha, QR Eńbek jáne halyqty áleýmettik qoraý mınıstrligi jalaqy bereshegi boıynsha monıtorıng júrgizip keledi. Mınıstrliktiń saıtynda apta saıyn eńbekaqy boıynsha qyzmetkerlerdiń aldynda bereshegi bar kásiporyndar týraly málimetter jarııalanady.

Jalaqy boıynsha eń úlken bereshek qurylys salasynda (573,5 mln. teńge nemese 51,1 %), halyq tutynatyn taýar satatyn mekemelerde (137 mln. teńge, 12,2 %), aýyl sharýashylyǵynda (26 mln. teńge, 2,3 %), jekemenshik mekemelerde (13,3 mln. teńge, 1,2 %), kúzet qyzmetin kórsetetin uıymdarda (26 mln. teńge, 2,3 %), kólik salasynda (12,9 mln. teńge, 1,2 %) tirkelgen.

Komıtet anyqtamasy boıynsha, Qazaqstanda tirkelgen 307 myń kásiporynda 5 mln. 200 myń azamat jaldamaly túrde qyzmet jumys jasaýda. Bul adamdardyń quqyqtary qanshalyqty qorǵalyp jatqandyǵy mınıstrliktiń jiti baqylaýynda tur.