Jalaqy birqalypty qarqynmen ósýde - Tımýr Súleımenov
ASTANA. QazAqparat - Qazaqstandyqtardyń jalaqysy birqalypty qarqynmen ósýde. Bul týraly búgin Úkimettiń selektorlyq rejimdegi otyrysynda Ulttyq ekonomıka mınıstri Tımýr Súleımenov aıtty, dep habarlaıdy QazAqparat tilshisi.
«Eńbek naryǵynda turaqtylyq saqtalady. Aǵymdaǵy jyldyń basynan beri 297,1 myń adam jumysqa ornalastyryldy. Jumyssyzdyq deńgeıi - 4,9 paıyz», - dedi mınıstr.
Onyń aıtýynsha, jalaqy da birqalypty qarqynmen ósýde.
«Aǵymdaǵy jylǵy qańtar-shildede ortasha aılyq jalaqy 157,7 myń teńgeni qurady jáne naqty máninde 2,3 paıyzǵa ósti. Aǵymdaǵy jyldyń qańtar-maýsymda naqty aqshalaı kirister 1,0 paıyzǵa artty», - dedi Tımýr Súleımenov.
