Jalaqy bereshegi: Eńbek ınspektorynyń uıǵarymy sot oryndaýshynyń buıryǵyna teńestirildi

NUR-SULTAN. QazAqparat – Jalaqy bereshegin ýaqtyly óteý maqsatynda elimizdegi eńbek ınspektorynyń jumys berýshige beretin uıǵarymynyń mártebesi sot oryndaýshynyń buıryǵyna teńestirildi. Bul týraly Eńbek jáne halyqty áleýmettik qorǵaý mınıstri Birjan Nurymbetov tolyǵyraq aıtyp berdi, dep habarlaıdy QazAqparat tilshisi.

«Jalpy, osy jyl boıy eńbek ınspektorlary 4,2 mlrd teńge kóleminde anyqtalǵan jalaqy qaryzdaryn óteı bildi. Qabyldanǵan sharalardyń nátıjesinde 31 myńnan astam jumyskerdiń quqyǵy qorǵaldy. Jalaqy bereshegin ýaqtyly óteýdi kúsheıtý maqsatynda bıyl zańnamalyq túrde memlekettik eńbek ınspektorynyń jumys berýshige beretin uıǵarymynyń mártebesi sot oryndaýshynyń buıryǵyna teńestirildi. Bul jalaqy qaryzdary úshin jumys berýshilerge qosymsha esepshottarmen múlikke tyıym salý, elden shyǵýǵa shekteý sharalaryn qoldanýǵa múmkindik beredi», - dedi Birjan Nurymbetov Úkimet otyrysynda.

Sonymen qatar Eńbek eáne halyqty áleýmettik qorǵaý mınıstrligi ákimdiktermen birge eńbek táýekeli kartasy aıasynda jumysshylardyń jumystan bosatylý qaýpi boıynsha apta saıyn monıtorıng júrgizýde. Osy jyl bastalǵaly 1200 kásiporynda 15 700 adam jumys ýaqytyn ıkemdi rejımge aýystyrǵan.

«Óz kezeginde jumys oryndaryn saqtaý baǵytynda Úkimet tarapynan shuǵyl sharalar qabyldandy. Karantın kezinde tabysynyń joǵaltýyna baılanysty azamattarǵa eń tómengi jalaqy mólsherindegi áleýmettik tólem berildi», - dedi mınıstr.