Qazaqstandyqtar jalaqysyna qaramastan birdeı MÁMS jarnasyn tóleıtin bolady

ASTANA. KAZINFORM — Densaýlyq saqtaý mınıstri Aqmaral Álnazarova elimizde MÁMS jarnasyn tóleýde bolatyn ózgeristerge túsinik berdi.

«Adam 100 myń teńge nemese 150 myń teńge jáne 850 myń teńgege deıin jalaqy alsa, bul somadan 2 paıyzy ustalyp keledi. Eger adam 850 myń teńgeden joǵary, aıtalyq 1,5 mıllıon teńge jalaqy alsa, saqtandyrý mólsherlemesi aıasynda tek 850 myń teńgege ǵana jarna tıisti deńgeıde tólenip jatyr. Endi árkim jalaqysynyń mólsherine qaramastan 2 paıyz tóleıtin bolady», — dedi Aqmaral Álnazarova Parlament Májilisinde tilshiler suraǵyna jaýap bere otyryp. 

Osy oraıda mınıstr vedomstvo bul bastamany júzege asyrýdy josparlap otyrǵanyn aıtty. Atap aıtqanda, paıyzdyń shamada tabysy tómen adamdar aýqatty azamattardan artyq tólemeýi kerek.

Densaýlyq saqtaý mınıstrliginiń basshysy bul qazaqstandyqtardyń kópshiligine áser etpeıtinin, óıtkeni mundaı joǵary jalaqy alatyndar halyqtyń shamamen 10 paıyzyn ǵana quraıtynyn aıtty.

«Bul norma bekitilse, halyqtyń 90 paıyzy úshin eshteńe ózgermeıdi. Bul norma negizinen eń tómengi 10 jalaqydan joǵary nemese 850 myń teńgeden joǵary jalaqy alatyn adamdarǵa qatysty bolady», — dedi mınıstr.

Budan buryn Aqmaral Álnazarova qazaqstandyqtar mindetti áleýmettik medıtsınalyq saqtandyrýdy (MÁMS) ádildik qaǵıdaty boıynsha tóleıtinin aıtqan edi.