Jalaqyny saqtaı otyryp, jumys kúnin qysqartýdyń tıimdiligi dáleldendi

ASTANA. KAZINFORM — Tórt kúndik jumys aptasy engizilgeli arada alty aı ótkennen keıin qyzmetkerler ózderiniń fızıkalyq jáne psıhıkalyq jaǵdaılarynyń jaqsarǵanyn, sondaı-aq kúızelistiń azaıǵanyn atap ótti, dep jazdy Euronews. 

Jumys aptasyn tórt kúnge qysqartý adamdardyń densaýlyǵyn nyǵaıtyp, kúızelis qaýpin azaıtýy múmkin. Bul týraly alty elde júrgizilgen pılottyq baǵdarlama nátıjeleri kórsetip otyr.

Jumys kúnin qysqartý — qyzmetkerler arasynda depressııa, mazasyzdyq pen kúızelistiń artýyna jaýap retinde qoldanylyp jatqan shara. Qazir mundaı tájirıbeni Polsha, Islandııa, Germanııa, Portýgalııa syndy elder de synap kórip jatyr. Al Belgııada jumysshylar resmı túrde tórt kúndik jumys aptasyn talap etýge quqyly.

Nature Human Behaviour ǵylymı jýrnalynda jarııalanǵan jańa zertteý jumys aptasyn qysqartýdyń qyzmetkerlerge de, jumys berýshilerge de tıimdi ekenin kórsetken. 

Zertteýge Avstralııa, Kanada, Irlandııa, Jańa Zelandııa, Ulybrıtanııa jáne AQSh-taǵy 141 uıymnan shamamen 2900 qyzmetker qatysqan. Bul kompanııalarda jumys ýaqyty qysqartylyp, jalaqy mólsheri sol kúıinde qalǵan.

Aıta keteıik, Polshanyń Otbasy, eńbek jáne áleýmettik saıasat mınıstrligi 30 maýsymnan bastap jumys ýaqytyn aptasyna bes kúnnen tórt kúnge qysqartý boıynsha pılottyq baǵdarlamany iske qosqan edi.

Al Japonııa demografııalyq daǵdarysty ońtaıly sheshý úshin eń iri qalasy — Tokıoda memlekettik qyzmetkerlerge 4 kúndik jumys aptasyn engizgen bolatyn. 

Ispanııa úkimeti jumys aptasyn 40-tan 37,5 saǵatqa deıin qysqartýdy qarastyratyn zań jobasyn maquldaǵan bolatyn.