Jalaqyny birneshe ret keshiktirse, jumys berýshini qylmystyq jazaǵa tartýǵa bola ma

ASTANA. KAZINFORM – Keıbir jaǵdaıda jumys berýshiler qyzmetkerleriniń eńbekaqysyn ýaqytyly tólemeı nemese aılap keshiktirip jatady. Osyndaı jaǵdaıda jumysshy berýshini mindetin oryndamaǵany úshin qylmystyq jazaǵa tartý múmkindigi bar ma?

Bul saýalǵa Eńbek jáne halyqty áleýmettik qorǵaý mınıstrligi memlekettik eńbek ınspektsııasy komıteti tóraǵasynyń orynbasary Erbolat Abýlhatın jaýap berdi.

- Jalaqy boıynsha eger eńbek sharty jasalǵan bolsa, árıne tolyq baqylaýda. Jalaqy bereshegi problemasy kóbine eńbek sharty jasalmaǵan jaǵdaıda týyndap jatady, ıaǵnı jumys isteıdi, aqshasyn tólemeıdi. Deıturǵanmen jumys berýshilerdi qylmystyq jazaǵa tartý boıynsha Qylmystyq kodekste baptar bar. Jumys berýshi birneshe ret jalaqy tólemeı jaltaryp júrgen jaǵdaıda, memlekettik eńbek ınspektsııasy osyny tergegen jaǵdaıda, tıisti materıaldardy jergilikti ishki ister organdaryna berý múmkindigi bar, - dep jaýap berdi Erbolat Abýlhatın ortalyq kommýnıkatsııalar qyzmeti alańynda ótken baspasóz máslıhatynda qoıylǵan suraqqa.

Onyń aıtýynsha, odan ári jergilikti ishki ister organdary jumys berýshini qylmystyq jazaǵa tartý boıynsha isti qaraýǵa alady.

Aıta keteıik, búginde elimizde 95 kásiporynda eńbek daýy qaralyp jatyr. 

Buǵan deıin habarlaǵanymyzdaı, jyl basynan beri eńbek qaýipsizdigin saqtamaǵan jumys berýshilerge 428 mln teńgeden astam aıyppul salynǵan.