Jalaqy keshikken ár kún úshin jumys berýshi aqsha tóleýge mindetti
ASTANA. KAZINFORM — QR Eńbek kodeksiniń 113-babyna sáıkes, jalaqyny aıyna keminde bir ret jáne kelesi aıdyń birinshi onkúndiginen keshiktirilmeı tólenýi tıis. Tólemniń naqty kúni eńbek nemese ujymdyq shartta belgilenedi. Eger belgilengen tólem kúni demalys ne mereke kúnine sáıkes kelse, jalaqy odan burynǵy kúnderde tólenedi.
Jalaqy keshiktirilse, ne isteý kerek?
Aldymen jumysker jumys berýshige júginip, keshiktirý sebebin anyqtap, bereshekti óteýdi talap ete alady.
Másele sheshilmese, jumysker jumys berýshiniń turǵan jerindegi Qazaqstan Respýblıkasy Eńbek jáne halyqty áleýmettik qorǵaý mınıstrligi Memlekettik eńbek ınspektsııasy komıtetiniń aýmaqtyq departamentine júginýge quqyly. Ótinishti eOtinish júıesi arqyly elektrondyq formatta da jiberýge bolady.
Ótinishke eńbek qatynastaryn jáne jalaqy boıynsha bereshekti rastaıtyn qolda bar qujattardy qosa tapsyrý kerek. Ol jerde eńbek sharty, esep aıyrysý paraqtary, bank kóshirmeleri, buıryqtar jáne ózge de rastaıtyn materıaldar bolýy múmkin.
Ótinish qaralǵannan keıin qandaı is-sharalar júrgiziledi?
Qajet bolǵan jaǵdaıda memlekettik eńbek ınspektorlary zańnamada belgilengen tártippen baqylaý is-sharalaryn júrgizedi.
Bereshek faktisi rastalsa, jumys berýshige buzýshylyqty joıýǵa, onyń ishinde jalaqy boıynsha bereshekti óteýge mindetti oryndalýǵa tıis nusqama beriledi. Nusqamanyń oryndalýyn memlekettik eńbek ınspektorlary baqylaýǵa alady.
— Sonymen qatar jumys berýshi jumyskerge jalaqy bereshegin ǵana emes, keshiktirilgen árbir kúntizbelik kún úshin turaqsyzdyq aıybyn da tóleýge mindetti. Onyń mólsheri jalaqy tóleý mindettemesi oryndalǵan kúni qoldanysta bolǵan QR Ulttyq Banki bazalyq mólsherlemesiniń 1,25 eselengen mólsheri boıynsha esepteledi, — delingen eńbek jáne halyqty áleýmettik qorǵaý mınıstrliginiń túsiniktemesinde.
Jumys berýshige qandaı jaýapkershilik kózdelgen?
Jalaqyny tolyq kólemde, belgilengen merzimde tólemegeni úshin, sondaı-aq jumys berýshiniń kinásinen turaqsyzdyq aıybyn eseptemegeni jáne tólemegeni úshin Qazaqstan Respýblıkasynyń Ákimshilik quqyq buzýshylyq týraly kodeksiniń 87-babynda ákimshilik jaýapkershilik kózdelgen.
Aıyppul mólsheri:
- laýazymdy adamdarǵa — 30 AEK;
- shaǵyn kásipkerlik sýbektilerine nemese kommertsııalyq emes uıymdarǵa — 60 AEK;
- orta kásipkerlik sýbektilerine — 100 AEK;
- iri kásipkerlik sýbektilerine — 150 AEK mólshetin quraıdy.
— Jalaqynyń keshiktirilýi jumyskerdiń eńbek quqyqtarynyń buzylýy bolyp sanalatynyn eske salamyz. Eger jumys berýshi jalaqyny belgilengen merzimde tólemese, jumysker zańnamada kózdelgen sharalardy qabyldap, óz quqyqtaryn qalpyna keltirý úshin memlekettik eńbek ınspektsııasy organdaryna júgine alady, — delingen habarlamada.
Buǵan deıin Qostanaı oblysynda 392 jumysshyǵa 711 mln teńge jalaqy bereshegi anyqtaldy.
