«Jalaqy 25% azaıǵan»: Jańadan qurylǵan Alataý qalasynyń muǵalimderi narazylyq bildirdi
QONAEV. KAZINFORM - Almaty oblysy Jetigen aýlynyń ornynda qurylǵan Alataý qalasynyń mektep muǵalimderi narazylyqqa shyqty. Ustazdar shaǵymyna aýyl mektepteriniń qala statýsyna aýysýyna baılanysty jalaqynyń 25% azaıýy sebep bolǵan.
Alataý qalasynyń muǵalimderi shaǵym bildirgen beınejazba áleýmettik jelide tarady.
«Biz jańadan qurylǵan Alataý qalasynyń muǵalimderi qyrkúıek aıynyń jalaqysyn alǵan kezde 25% ústemaqymyzdan aıyrylyp otyrmyz. Osy máseleni sheship berýlerińizdi suraımyz. Sebebi biz qala bolyp ketken joqpyz. Qaı aýylda turdyq, sol aýylda turyp jatyrmyz», - deıdi beınejazbadaǵy muǵalimder.
Alataý qalasynyń Bilim bólimi 1 qazan kúni Alataý qalasyndaǵy №1 jáne №47 mektepteriniń pedagogıkalyq ujymdary jergilikti memlekettik organ ókilderimen kezdeskenin habarlady.
«Týyndaǵan máselelerdi jan-jaqty qaraý maqsatynda kezdesýge Alataý qalasy ákiminiń orynbasary, qalalyq bilim bóliminiń basshysy, sondaı-aq oblystyq bilim jáne ishki saıasat basqarmalarynyń ókilderi qatysty. Nátıjeli dıalog barysynda eńbekaqy tóleý máselelerimen qatar, turǵyndardyń ózekti máseleleri – kólikpen qamtamasyz etý, qoqys shyǵarý, gazben jabdyqtaý máseleleri de talqylandy. Kezdesý qorytyndysy boıynsha pedagogıkalyq ujymdarmen ózara túsinistikke qol jetkizildi», - dep habarlady Bilim bóliminiń baspasóz qyzmeti.
Eske salaıyq, jyl basynda Prezıdent qaýlysymen Alataý qalasy quryldy.
Mamyr aıynda Arken Ótenov Alataý qalasynyń ákimi bolyp taǵaıyndaldy.