Jalaqy 1 mln-ǵa barady: Almaty oblysynda qurylysshylar men sharýalar jetispeıdi
ALMATY. KAZINFORM — Almaty oblysynda basshylyq qyzmetterden bastap tehnıkalyq mamandyqtarǵa deıin myńdaǵan bos jumys orny bar.
Oblys ákimdiginiń málimetinshe, óńirde bilikti kadrlarǵa suranys óte joǵary. Máselen, oblystaǵy mekemelerdiń biri zań bóliminiń basshysy laýazymyna 1,25 mln teńge jalaqy tóleýge daıyn. Sonymen qatar ózge de kásiporyndardaǵy birqatar basshylyq jáne joǵary bilikti mamandar úshin jalaqy 1 mln teńgege deıin jetedi. Olardyń qatarynda bas býhgalter, bólim basshysy, bas mehanık jáne joba boıynsha bas tehnolog bar.
Medıtsına salasynda jalpy hırýrg dárigerine 950 myń teńgege deıin, bas dáriger nemese mekeme basshysyna 877 myń teńgege deıin jalaqy usynylady.
Tehnıkalyq mamandyqtar boıynsha da jalaqy deńgeıi joǵary. Bas ınjener, geodezıst, tıegish mashınalardyń mashınısi, jınaqtaýshy jáne qoıma meńgerýshisi sııaqty mamandarǵa 600–700 myń teńge kóleminde jalaqy usynylady.
2026 jyly mamandarǵa degen eń joǵary suranys qurylys salasyna tıesili. Bul baǵytta 661 maman qajet. Aýyl sharýashylyǵynda — 557, ónerkásip pen óndiriste — 333, kólik jáne logıstıka salasynda — 246, turǵyn úı-kommýnaldyq sharýashylyq pen energetıkada 157 mamanǵa suranys bar.
Almaty oblysy ákimdiginiń boljamyna sáıkes, aldaǵy 5 jylda óńirge 21 myńnan astam maman qajet bolýy múmkin. Eńbek naryǵynda bıyl 4 792 maman orny bos tursa, 2027 jyly — 4 723, 2028 jyly — 4 793, 2029 jyly — 4 245, 2030 jyly — 3 790, al 2031 jyly — 3 856 maman qajet bolady.
— Eńbek naryǵyndaǵy suranysty Elektrondyq eńbek bırjasyndaǵy kórsetkishter de rastaıdy. Máselen, Enbek.kz platformasynda Almaty oblysy boıynsha 2 637 habarlandyrý jarııalanyp, 5 115 bos jumys orny usynylǵan, — dep habarlady ákimdikten.
Sondaı-aq óńir basshylyǵy 2026 jyldyń I toqsanynda Almaty oblysynda ortasha aılyq 376 012 teńge bolǵanyn atap ótti.
Eske salaıyq, buǵan deıin Qazaqstannyń óńdeý ónerkásibinde 17,3 myń jańa jumys orny qurylatynyn jazǵanbyz.
