Jalaǵashtyq kásipkerler jalǵyzbasty anaǵa baspana alyp berdi - Qyzylorda

JALAǴASh. QazAqparat - Qyzylorda oblysy Jalaǵash aýdanynda tórt balaly jalǵyzbasty anaǵa páter kilti tabys etildi, dep habarlaıdy QazAqparat tilshisi.

Jalaǵash kentinde turatyn Gúlmıra Aqylbaeva tórt balany tárbıelep otyr. Jalǵyzbasty ana Oraza aıty merekesiniń alǵashqy kúninde 2 bólmeli úıge qol jetkizdi. Bul ıgilikti iske Jalaǵash aýdany ákimdigi bastamashy bolǵan.

Kiltti tabys etken aýdan ákimi Qaıratbek Sársenbaev: «Aýdan kásipkerleri qoǵamdyq jumystarǵa belsene atsalysyp, ár merekede turmysy tómen otbasylarǵa kómek kórsetip keledi. Ákimdik tarapynan birqatar kásipkerge osyndaı bir otbasyna baspana alyp berýge usynys jasalǵan edi. Kásipkerler bul usynysty qoldap, búgingi Aıt merekesi qarsańynda páter kiltin tabystaǵaly otyrmyz», - dedi.

Óz kezeginde G.Aqylbaeva aýdan ákimdigine, demeýshi azamattarǵa alǵysyn bildirse, kenttiń ardagerler keńesiniń tóraǵasy Birjan Kóshtaev aq batasyn berdi.

Aıta ketý kerek, qazirgi tańda aýdan boıynsha 4 jáne odan da kóp bala tárbıelep otyrǵan analar sany - 842, «Kúmis alqa», «Altyn alqa» ıegerleri - 1077.

Budan buryn Qyzylorda qalasynyń bilim bólimi turmysy tómen otbasyna baspana salyp bergenin habarlaǵan edik.