Jalaǵashta mal urlaǵandar jazasyn aldy - Qyzylorda oblysy
QYZYLORDA. QazAqparat - Qyzylorda oblysy Jalaǵash aýdandyq soty mal urlyǵyna qatysty qylmystyq is boıynsha úkim shyǵardy. Bul iske kúdikti retinde tanylǵan 4 adam 20-ǵa jýyq iri qara jáne ýaq maldy qoldy etken, dep habarlaıdy QazAqparat tilshisi.
Jábirlenýshiler ótken jyly jergilikti ishki ister bólimine maldary urlanǵany jóninde shaǵym túsirdi. Jaıylymǵa jibergen maldary qaıtpaı qalý jaǵdaıy jıi oryn ala bastaǵan edi. Tártip saqshylary jedel izdestirý nátıjesinde urlyqqa qatysy bar 4 kúdiktini qolǵa túsirdi.
Kúdiktiler maldardy jaıylymnan qoldy etip kelgen. Tipti, olar maldy qoradan da alyp ketken jaǵdaılar kezdesken. Qylmystyq is aýdandyq sotta bir aı boıy qaraldy. Aıta ketelik, bul qylmystyq is 14 epızod boıynsha júrgizildi.
«Kúdiktiniń ekeýine jábirlenýshiler tarapynan keshirim berilgen. Olarǵa keltirilgen shyǵyndardy ótep beretin bolǵandyqtan jábirlenýshiler osyndaı sheshimge kelgen», - dedi Jalaǵash aýdandyq sotynyń tóraǵasy Asylhan Mızanbaev.
Sot úkimimen sottalýshylardyń ekeýiniń birneshe márte mal urlyǵyn jasaǵany úshin 2 jyl 6 aıǵa bas bostandyǵy shekteldi. Al taǵy ekeýi keltirilgen zalaldy ótep, jábirlenýshilermen bitimge kelýine baılanysty qylmystyq isteri toqtatylyp, sot zalynan bosatyldy.
Ádiljan Úmbet
