Jalaǵashta aýdandyq aýrýhana qurylysy bastaldy
Búginde Jalaǵash aýdanynda 37 myńǵa jýyq adam turady. Dese de onda jergilikti turǵyndarǵa zamanaýı deńgeıde qyzmet kórsetetin aýrýhana bolmaı keldi. Sol túıtkildiń túıini jaqyn ýaqytta sheshiletin boldy.
Tuńǵysh Prezıdent - Elbasy Nursultan Nazarbaevtyń 2018 jylǵy 5 qazandaǵy Qazaqstan halqyna joldaýynda aýyldyq jerlerde alǵashqy medıtsınalyq-sanıtarlyq kómektiń qoljetimdi bolýyn qamtamasyz etý shart ekeni kórsetilgen.
Jalaǵash aýdandyq aýrýhanasynyń irgetasyn qalaý rásimine oblys ákimi Qyrymbek Kósherbaev qatysty.
Aımaq basshysy atalmysh sharaǵa jınalǵan jurtshylyqty Qasıetti Ramazan aıy jáne jańa aýrýhana qurylysynyń bastalýymen quttyqtady
«Keshe óńirimizde el Prezıdenti Qasym-Jomart Kemeluly Toqaev jumys saparymen boldy. Memleket basshysy Syr óńirindegi eldiń ál-aýqatyn eselep, halqymyzdyń baq-berekesin arttyrǵan óńir ekenin aıtyp, bizdegi kásipkerlik, ındýstrııalandyrý, qurylys jumystaryna oń baǵasyn berdi. Bul baǵalaýda Sizderdiń barshańyzdyń týǵan jerimizdi damytýǵa qosqan ólsheýsiz úlesterińiz bar ekenin atap ótkim keledi. Jalaǵash aýdanynda da sol ıgilikti isti jalǵastyryp, halyqqa sapaly medıtsınalyq kómek kórsetý maqsatynda 100 oryndyq jańa aýrýhana qurylysyn salýdy bastaǵaly otyrmyz. Aýdanda jańa tıptegi, zamanaýı quraldarmen jabdyqtalǵan aýrýhana salý ózekti máselelerdiń biri edi. Burynǵy ortalyq aýrýhana 1997 jyly asar ádisimen salynǵan. Bizdiń mindetimiz - halyqty sapaly jáne qoljetimdi medıtsınalyq qyzmettermen qamtamasyz ete otyryp, zamanaýı aýrýhana, emhanalarda em alýyna jaǵdaı jasaý», - dedi aımaq basshysy.
Aýdan turǵyndarynyń ózekti máselesiniń sheshim tapqany úshin densaýlyq saqtaý salasynyń ardageri Sahy Qalybaev oblys ákimine alǵysyn bildirdi.
Aıta keteıik, aýrýhana qurylysyn aıaqtaý 2020 jylǵa josparlanyp otyr.
