«Jalgırıs» bapkeri: Ekinshi gol qolmen soǵyldy dep sanaımyn
ASTANA. QazAqparat - «Jalgırıs» klýbynyń bas bapkeri Valdas Dambraýskas «Astana» komandasyn ÝEFA Chempıondar lıgasynyń irikteý týryndaǵy jeńisimen quttyqtady.
Degenmen ol ekinshi goldy Anıchıch qolmen soqty dep esepteıtindigin jasyrmady.
«Oıyn trıller úshin Oskarǵa laıyq. Degenmen «Astana» byltyr HIK komandasyna gol soqqandaı sońǵy mınýttarda dop salyp ketti. Ne aıtsaq ta, «Astanany» jeńisimen quttyqtaýymyz qajet. Fýtbolshylar búgin óte jaqsy oınady. Eshteńe isteı almaısyń, bul - fýtbol. Keıde sen gol salasyń, keıde saǵan salady. Іsti sońyna deıin jetkizý kerek edi. «Astana» ChL toptyq kezeńine deıin qaıta shyǵýyn tileımiz», - dedi ol matchtan keıingi baspasóz máslıxatynda.
Sonymen qatar ol «Astana» oıynda jyldamyraq, myqtyraq boldy, qaýipti jaǵdaılardy jıi jasady dep sanaıdy, alaıda gol salý múmkindikteri boıynsha «Jalgırıs» jeńiske jetýi tıis bolǵan dep otyr.
«Menińshe, match sońyna qaraı biz kóptegen buryshtama men aıyp doptarynyń arqasynda gol salýymyz kerek bolǵan. Fýtbolda solaı ózi, jeti, segiz fýtbolshy, tipti keıde 10 fýtbolshy shabýylǵa shyǵyp ketken kezde búgingi jaǵdaıǵa uqsas kezder bolyp jatady. Menińshe, ekinshi golda tóreshi qatelik jiberdi, gol qolmen salyndy. Vıdeodan qaıtalap kórińizder», - dedi ol.
