Jaqyp Asanov sýdıalyqqa irikteýdiń jańa talaptaryn túsindirdi
ASTANA. QazAqparat - Parlament Senatynyń jalpy otyrysynda «Qazaqstan Respýblıkasynyń sot júıesi men sýdıalarynyń mártebesi týraly» QR Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq Zańy jáne «Qazaqstan Respýblıkasynyń keıbir zańnamalyq aktilerine sot júıesin jańǵyrtý máseleleri boıynsha ózgerister men tolyqtyrýlar engizý týraly» Zańy qabyldandy, dep habarlaıdy QazAqparat.
«Dúnıejúzilik reıtıngte Qazaqstan sottarda jaǵdaı jasaý jaǵynan tórtinshi orynǵa kóterildi. Bizdiń aldymyzda Ońtústik Koreıa, Norvegııa, Sıngapýr tur. Osy sharalardy «100 naqty qadamnyń» tikeleı jemisi de qabyldaý kerek», - dedi QR Joǵarǵy sotynyń tóraǵasy Jaqyp Asanov.
Sotqa degen senimdi arttyrý máselesine toqtalǵan ol: «Elbasy sot júıesiniń aldyna úlken úsh mindetti qoıdy. Eń aldymen, biz qajetti yntalandyrýdy jasap, sot júıesine myqty zańgerlerdi tartýymyz kerek. Ókinishke qaraı, búginde bilikti zańgerler sýdıa bolǵysy kelmeıdi. Óıtkeni olar saladaǵy barlyq qıynshylyqtardy, júktemeniń kóptigin biledi. Sonymen qatar, ekinshi mindette sottardy daýy joq isterden bosatyp, kúrdeli isterge jumyldyrý. Al úshinshi mindet sot protsesin artyq bıýrokratııadan tazartyp, ony tıimdi, túsinikti ári qolaıdy etý», - dedi.
Onyń sózine qaraǵanda, atalǵan úsh baǵyt boıynsha múddeli organdarmen birlese 11-ge tarta zań jobasy ázirlendi. Al búgin Senattyń jalpy otyrysyna usynylǵan eki zań jobasy birinshi mindetke qatysty bolyp otyr, ıaǵnı kadr máselesine arnaldy.
«Sot júıesiniń tiregi - ol sýdıa. Jaqsy mamandar osy salaǵa umtylmaıdy. Bizdiń sottarda qaralatyn isterdiń 85 paıyzy azamattyq daýlarǵa qatysty. Onyń ishinde shaǵymdardyń kóbi memlekettik organdardyń sheshimine arnalǵan. Bul problemany sheshý úshin ol salany jaqsy biletin mamandar kerek. Sot júıesi mamandarǵa muqtaj. Bizge qajet bul adamdardyń mansaby qalyptasqan jáne olar negizinen 40 jastaǵy azamattar. Bul azamattardy oblystyq sottar qyzyqtyrýy múmkin, alaıda olar oblystyq sottyń aldynda aýdandyq deńgeıden ótýi tıis. Aýdandyq sotqa 40-tan asqan azamat barmaıdy. Sondyqtan bul zań jobasy arqyly biz osy talapty alyp tastap, jalpy appelıatsııa satysyna, oblystyq sottarǵa 15 jyldyq zańgerlik eńbek ótili bar mamandarǵa jol ashyp, konkýrsqa qatysýǵa jaǵdaı jasalýda», - dedi Jaqyp Asanov.
Onyń aıtýynsha, buryndary jyl saıyn orta eseppen sýdıalyqqa 150 adam qabyldanatyn. Byltyr 29 adam qabyldanǵan eken, ıaǵnı 5 ese az boldy. Bul rette talaptar kúsheıtildi.
«Іrikteýdiń jańa tártibi arqyly sýdıalyqqa tek bilimdiler men biliktiler ótetin bolady, kezdeısoq adamdarǵa tosqaýyl qoıamyz. Bul júıe jańa kadrlarǵa qatysty», - dedi Joǵarǵy sot tóraǵasy.
Esterińizge sala keteıik, 2018 jyldyń qarasha aıynda Memleket basshysy Parlament Májilisiniń qaraýyna «Qazaqstan Respýblıkasynyń sot júıesi men sýdıalarynyń mártebesi týraly» QR Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zańynyń jáne «Qazaqstan Respýblıkasynyń keıbir zańnamalyq aktilerine sot júıesin jańǵyrtý máseleleri boıynsha ózgerister men tolyqtyrýlar engizý týraly» zańynyń jobalaryn engizdi.
