Jaqyp Asanov Sot tóreligi akademııasyn synǵa aldy
«Men Sot tóreligi akademııasy áli de sot kadrlarynyń negizgi tasymaldaýshysy bolýy kerektigin aıtqan edim. Biraq 2019 jyldy eseptemegende keıingi úsh jyldy alyp qarasaq, akademııany bitirýshilerdiń tek 16 paıyzy sýdıa bolǵan. Akademııada qalǵan túlekterdiń ne istep júrgenin bilesiz be?» - dep surady Jaqyp Asanov 2019 jyldyń qorytyndylary boıynsha qazaqstandyq sottardyń otyrysynda.
Joǵarǵy sot tóraǵasynyń aıtýynsha, qazirgi tańda akademııa túlekteriniń qandaı memlekettik organda jumys istep jatqany taldanyp, zerttelý ústinde.
«Kimdiń naqty qaıda júrgeni bir aıdyń ishinde belgili bolady. Sebebi, úsh jarym jyldyń ishinde biul másele bir ret te bolsa zerttelýi tıis edi. Bıyl biz 17 qańtardan bastap oqýǵa ruqsat berý týraly túzetýler jobasyn engizip, Joǵarǵy sotqa joldadyq. Oǵan sáıkes, akademııany bitirgennen keıingi talaptar boıynsha tolyqtyrýlar engizilgen», - dedi akademııa rektory Záýresh Baımoldına.
Jaqyp Asanovtyń aıtýynsha, eger Joǵarǵy sot bul ustanymdy qoldaǵan jaǵdaıda tıisti ózgerister kúshine enedi.
«Ol ózgeristerge sáıkes, memleket oqý úshin bólgen shyǵyndaryn óteýge deıingi sharalar bar. Menimen áńgimelesken kezde sizder 2018 jyly qabyldanǵan ekinshi kýrs jáne 2019 jyly qabyldanǵan birinshi kýrstyń aıyrmashylyǵy bar dep aıtqan edińizder. Ekinshi kýrstaǵylar – jaqynda elge aty shyqqandar», - dedi Jaqyp Asanov akademııa rektory Záýresh Baımoldınaǵa qarata.
Jaqyp Asanov ótken jyly úmitkerlerdi irikteý isin aıqyndaý úshin ótken jyly Joǵarǵy sot deńgeıinde komıssııa qurý qajettigi týyndaǵanyn málim etti.
