Jaqyp Asanov oblystyq sottarǵa: Statıstıkada jalǵan derekter kóp
ASTANA. QazAqparat - Oblystyq sottardyń Joǵarǵy sotqa jiberetin statıstıkalarynda jalǵan derekter kóp. Bul týraly búgin sot tóreligin júzege asyrýdyń 2017 jylǵy qorytyndysyna arnalǵan keńeıtilgen keńeste QR Joǵarǵy sotynyń tóraǵasy Jaqyp Asanov aıtty, dep habarlaıdy QazAqparat.
«Árıne, daýlar kez kelgen qoǵamda bar. Biraq olardyń barlyǵyn sotta sheshý múmkin emes. Sot eki jaqty birdeı qanaǵattandyra almaıdy. Eń tıimdi jol daýdy sotsyz sheshetin ınstıtýttardy damytý. 2017 jyly bitimmen aıaqtalǵan daýlardyń úlesi 4 paıyz. Shyndyǵyn aıtsam, bul tsıfrǵa men senbeımin. Óıtkeni, keshe ǵana maǵan aıtty, onyń ishinde ótirik kóp. Ne úshin istep júrsizder sonda? Myna jerde maqtaý qaǵazyn alý úshin be? Sonda halyqtyń pikiri Sizderge mańyzdy emes qoı? Statıstıkada jalǵandyq kóp», - dedi QR Joǵarǵy sot tóraǵasy.
Onyń aıtýynsha, taraptardy bitimge keltirý qazaq halqy úshin jańalyq emes. Óıtkeni, bıler sotynyń túpki maqsaty ekijaqty tatýlastyrý, tabystyrý bolǵan.
«Daý muraty bitý» degen naqyl sóz osydan qalǵan. Ekinshi jaǵynan bul álemdik trend. Damyǵan elderde tartysty sheshetin balama ınstıtýttar kóp. AQSh-ta, damyǵan elderde daýdyń kóbisi sottan tys jerde sheshiledi. Qytaıda tartystardyń 30 paıyzy, Slovenııada 40 paıyzy sotta bitimmen aıaqtalady. Biz múmkindiginshe bireýi jeńsin, ekinshisi jeńilsin degenge umtylamyz», - dedi ol.
