Jaqyp Asanov Qytaıda sottalǵan qazaqstandyqtardy elge oraltýǵa kúsh salmaq
Aıta keteıik, QR Bas prokýrory Jaqyp Asanov 30-31 naýryz kúnderi QHR-ǵa saparmen baryp, sol eldiń Ádilet mınıstri Chjan Tszıýnmen zań salasyndaǵy memlekettik qyzmetterdi usynýdyń ashyqtyǵy jáne qylmystyq-atqarý júıesin jetildirý máselelerin talqylady. Kezdesýde Jaqyp Asanov QHR-da sottalyp, aıybyn ótep jatqan 9 qazaqstandyq azamat týraly sóz qozǵady. Olardyń Qazaqstanǵa aýysqysy keletinin, biraq QHR-da olarǵa salynǵan aıyppuldy tóleýge múmkindikteri joq ekendigin aıtty.
Jalpy, QR Bas prokýratýrasynyń málimetterinshe. aǵymdaǵy jyldyń 14 naýryzynda Qytaıdan úsh otandasymyz elge jazasyn odan ary óteý úshin jetkizilgen.
«2017 jyldyń 22 aqpanynda Qytaıdyń ádilet mınıstrligi QR Bas prokýratýrasynyń atalǵan máselege qatysty qoldaý hatyn qanaǵattandyrǵan bolatyn. Azamat K. men R. quny 3,5 mln. dollardan asatyn Amýr kıiginiń 719 dana múıizin kontrabandalaǵany úshin qytaı soty taǵaıyndaǵan jazalaryn ótegen. Úshinshi azamat ta Qytaıǵa jalpy quny 115 myń AQSh dollaryn quraıtyn aıý terisin, 35 dana aıý tabanyn jáne 13,71 keli kordıtsepsti (dástúrli qytaı medıtsınasynda qoldanylatyn sırek kezdesetin sańyraýqulaq túri) kontrabandalyq jolmen tasymaldaǵan», - delingen aqparatta.
Sonymen qatar vedomstvo aqparatynda qytaı sottarynyń úkimi Qazaqstan aýmaǵynda da moıyndalatyndyǵy jáne ulttyq zańnamamyzǵa sáıkes júzege asyrylatyndyǵy atap ótilgen.
«Bizdiń azamattarymyzǵa jaza merzimin odan ary otanynda óteýge múmkindik berdi. Atap óterligi, qytaılyq áriptestermen is-qımyldyń jolǵa qoıylýynyń arqasynda QHR-men sottalǵandardy ózara berý týraly shart kúshine (30.09.2015) engen sátten beri 14 qazaqstandyq elge qaıtaryldy. Búgingi kúni qytaı túrmelerinde taǵy 9 qazaqstandyq jazasyn óteýde. Atalǵan tulǵalardyń 10-nan 100 myń ıýanǵa deıin tólenbegen aıyppuldary bar. osyǵan baılanysty olardy Qazaqstanǵa aýystyrýdan bas tartylǵan. Qazirgi ýaqytta olardyń tek úsheýi ǵana aıyppuldaryn tólep, bas tartý sheshimi qaıta qaralýda. Bul baǵyttaǵy jumystar jalǵasady», - dedi Bas prokýratýra baspasóz qyzmetinen.
