Jaqyp Asanov Konstıtýtsııada prokýratýra ókilettiginiń qysqarýyna qatysty pikirimen bólisti
QR Parlamentiniń depýtaty Bekbolat Tileýxan Bas prokýrorǵa qoıǵan saýalynda prokýratýranyń ókilettigi jańa Konstıtýtsııamen birge qysqaryp qalmaıdy ma degen kúdigin jetkizgen bolatyn.
«Konstıtýtsııaǵa ózgertý engizý degen basty maqsattyń ózi bılik tarmaqtary arasynda Prezıdent ókilettiligin bólý. Elbasynyń negizgi tapsyrmasynyń ózi de osy. Konstıtýtsııanyń 83-baby ájeptáýir ózgeretindigin kórip otyrmyz. Osy ózgerister prokýratýra qyzmetine qandaı jańalyq ákeledi? Sonda prokýratýra organdary da óz ókilettigimen bólisetin bolady ma?», - dedi B. Tileýxan.
Óz kezeginde, Bas prokýror osy baǵytta birshama ózgerister oryn alatynyn rastady.
«Rasynda da Siz durys aıtasyz, mynaý eki mátindi salystyrsaq, búgingi redaktsııa men usynylyp otyrǵan jobanyń arasynda aıyrmashylyqtar bar. Biraq bir aıta ketetin jaıt - negizgi bizdiń baǵyttarymyz, bazalyq bizdiń jumysymyzdyń mazmuny, ol - joǵary qadaǵalaý, zańdylyqty qamtamasyz etý, sotta memlekettiń múddesin bildirý, qylmystyq qýdalaý, osynyń barlyǵy jańa jobada saqtalyp tur. Al jalpy mynaý búgingi mátinde bizdiń kóp fýnktsııalarymyz egjeı-tegjeıli jazylǵan. Al odan búgingi kúni bizge qandaı kedergi bar? Biz zaman talabyna saı, kóp ózgeristerdi der kezinde jasa almaı otyrmyz. Sondyqtan bizdiń oıymyzsha, bul redaktsııa óte durys. Al bizdiń ókilettiligimiz azaımaı ma, qysqarmaı ma, ol árıne Parlament bıliginde. Sondyqtan osy suraqpen biz sizderdiń aldaryńyzǵa áli talaı kelemiz. Kóp máseleler zań deńgeıinde qaralatyn bolady. Konstıtýtsııada naqtylanbaıdy», - deıdi J. Asanov.
Bunyń aldynda xabarlaǵanymyzdaı, prokýratýra quzyry jeke zańmen belgilenedi. Konstıtýtsııaǵa ózgerister men tolyqtyrýlar engizý týraly jańa zań jobasynda prokýratýraǵa qatysty birqatar quzyr alynyp tastalady. Bul týraly QR Prezıdenti Ákimshiliginiń basshysy Ádilbek Jaqsybekov Parlament palatalarynyń birlesken otyrysynda málim etti.
