Jaqyp Asanov daýlasýshy taraptardy sotqa jetkizbeı tatýlastyrýdy usyndy
«Bizde daýdy tek sot sheshedi degen kózqaras qatyp qalǵan. Keıde basynda ashýǵa berilip, sotqa júginip, keıin basylyp, «qatty ketken joqpyn ba, aldyma kelse sheshý jolyn izder edim ǵoı» dep ókinip jatamyz. Sottar osyndaı beıbit joldy kórsetetin, urys-kerissiz, birin-birin tyńdap, mámilege kelýge jaǵdaı jasaıtyn «altyn kópir» bolýy tıis. Sot, ákimder, assambleıa, partııalar bolyp osyny qolǵa alsaq... Qaı kezde de sózge toqtaǵan halyqpyz ǵoı. Bitimniń, tatýlasýdyń bar paıdasyn jyly, súıegine ótetindeı, júregine jetetindeı sózdermen aıtyp úırensek, onda qoǵamda shaǵym azaıady. Jalpy ahýal jaqsarady. Sottasyp, tartysyp, arazdasyp júrgen adamdarda qandaı kóńil bolsyn», - dedi ol.
Osy rette Jaqyp Asanov keńeıtilgen keńeske qatysyp otyrǵan oblys ákimderiniń orynbasarlaryna ótinish jasady.
«Sizderge ótinish, aıtysyp júrgen aǵaıyndardy ymyraǵa keltiretin, bitimge shaqyratyn onyń artyqshylyǵyn, utymdy jaǵyn ashyp kórsetetin, sotqa jetkizbeı tatýlastyratyn bir tıimdi organ jasasaq. Oǵan myqty mamandardy daıyndasaq, medıator, psıholog, konflıktolog, otstavkadaǵy sýdıalardy jáne sózge sheshen, oıy júırik, halyqpen tikeleı sóılese biletin, tilin tabatyn, kóndire alatyn tulǵalardy tartsaq», - dedi Joǵarǵy sot tóraǵasy.
Onyń dereginshe, myń adamǵa shaqqanda daýdyń kóbisi Almatyda, Astanada, Batys Qazaqstan, Pavlodar, Qaraǵandy oblystarynda tirkelgen.
«Mysaly Ońtústik Qazaqstan oblysynda myń adamǵa shaqqanda daýlar Almatymen salystyrsaq 5 ese az. Jumyla kótergen júk jeńil degendeı, bar kúshimizdi osyǵan salsaq, sonda daý da qysqarady, bılikke de ókpe azaıady, sottarǵa da senim ósedi», - dedi Jaqyp Asanov.
