Jaqyp Asanov «BUU-áıelder» qurylymymen ózara yntymaqtasýǵa ýaǵdalasty

ASTANA. QazAqparat - 21 qazan kúni Bas prokýratýrada vedomstvo basshysy Jaqyp Asanov «BUU-áıelder» qurylymynyń Qazaqstandaǵy ókili Ileın Konkıevıchpen kezdesti.

I.Konkıevıch adam quqyqtaryn qorǵaý jáne zańnyń ústemdigi, demokratııalyq ınstıtýttar, genderlik problemalar sııaqty salalardyń tájirıbeli mamany, halyqaralyq qatynastardyń magıstri.

Kezdesý barysynda Bas Prokýror «BUU-áıelder» qurylymymen uzaq ýaqyt boıy jyly ári senimdi qarym-qatynastyń qalyptasyp otyrǵanyn atap ótti. «BUU-áıelder» qurylymy Qazaqstanda áıelderge qatysty zorlyq-zombylyqqa jol bermeý, zorlyq-zombylyq qurbandaryna qoldaý kórsetý jáne basqa da ózekti máseleler boıynsha jumystarǵa belsendi qatysýda.

«BUU-áıelder» qurylymy Bas prokýratýranyń iske asyryp otyrǵan «Otbasyndaǵy zorlyq-zombylyqsyz Qazaqstan» atty jobasyna konsýltatıvtik jáne sarapshylyq kómek kórsetýde, aımaqtarda túrli is-sharalar ótkizilýde.

Bas prokýratýra men «BUU-áıelder» arasyndaǵy yntymaqtastyqty odan ári nyǵaıtý úshin áıelderdiń quqyqtaryn qorǵaý men iske asyrý salasyndaǵy ózara áreket etýdiń basty baǵyttary men nysandaryn aıqyndaıtyn Memorandýmǵa qol qoıyldy. Taraptar áıelderge qatysty zorlyq-zombylyqtyń ártúrli formalaryn joıýǵa, turmystyq-otbasylyq quqyq buzýshylyqtardyń aldyn alýǵa erekshe kóńil bóldi.

Kezdesý sońynda Jaqyp Asanov bul Memorandým ózara yntymaqtastyqty sapaly jańa deńgeıge shyǵarýǵa múmkindik beretinin jáne alǵa qoıylǵan maqsattardy tıimdi iske asyrýǵa septigin tıgizetinin atap ótti.