Jaqyp Asanov Azamattyq-protsessýaldy kodeksti ózgertýdi usyndy

ASTANA. QazAqparat - Azamattyq-protsessýaldy kodekstiń keıbir baptary sýdıalardyń jumystaryna qolbaılaý bolyp otyr. QR Joǵarǵy sot tóraǵasy Jaqyp Asanovtyń aıtýynsha, Kodekste ondaı kedergiler kóp, dep xabarlaıdy QazAqparat tilshisi.

«Nege sýdıa máseleniń mánisine jetpeıdi? Nege isti jan-jaqty qaramaıdy? Halyqtyń kóbisi osylaı aıtady. Biraq qazirgi Azamattyq protsessýaldy kodeks sýdıaǵa qolbaılaý bolyp otyr. Osyny ashyq aıtý qajet. Kodeks boıynsha sýdıanyń óz betimen istiń mán-jaıyn anyqtaýǵa quqysy joq. Ol tek taraptardyń usynǵan materıaly aıasynda ǵana jumys isteýi kerek. Osy shekteýden shyǵýǵa ruqsat joq. Bir nárse jetispeı jatsa, sýdıa ony talap ete almaıdy», - dedi J.Asanov búgin Astanada ótken halyqaralyq semınarda.

Bas sýdıanyń aıtýynsha, sotta bir tarap aryzda óz talabyn durys kórsetpese, sýdıa oǵan keńes bere almaıdy.

«Ondaı mysaldar kóp. Sýdıa talaptyń, ıa bolmasa, ótinishtiń durys jazylmaǵanyn kóre tura, óz aqyl-keńesin bere almaıdy. Sebebi artynan ony bireýge jaqtasty dep, aıyptap shyǵýy múmkin. Sot tóreligi ádil bolsyn desek, sýdıaǵa máseleniń mánisin zerdeleýge ruqsat berý kerek. Ol daý-damaıdyń mánisin bilmeseń, ádil sheshimdi shyǵarý qıyn. Ol úshin sýdıaǵa protsessýaldyq belsendilik quziretin bergen jón», - dep atap kórsetti J.Asanov.

Aıta keteıik, búgin Astanada ınvestıtsııalyq jáne kommertsııalyq daýlardy sheshý máselesine arnalǵan halyqaralyq semınar bastaldy. Otandyq jáne sheteldik sarapshylar Ekonomıkalyq yntymaqtastyq jáne damý uıymynyń osy saladaǵy tájirıbesin zerdelep, ony Qazaqstanda engizý jaıyn qarastyrýda.  Sol jerde QR Joǵarǵy sot tóraǵasy Jaqyp Asanov artyq jumysty qysqartyp, sottarǵa tek prokýratýra arqyly ǵana júginýdi usyndy.  Sondaı-aq, aldaǵy ýaqytta sottardyń memorgan basshylaryna aıyppul salatynyn jetkizdi.