Jaqyp Asanov: Azamattar óte kúrdeli tilmen jazylǵan sot sheshimin túsinbeıdi

ASTANA. QazAqparat - QR Joǵarǵy sotynyń tóraǵasy Jaqyp Asanov sot sheshimin qurastyrý ádisi boıynsha normatıvtik qaýlynyń jobasy daıyndalǵanyn málim etti. dep habarlaıdy «QazAqparat» HAA tilshisi.

«Búgin óte ózekti, mańyzdy máseleni qaraımyz. Ol sottardyń, sýdıalardyń sheshimi qandaı bolýy kerek degen másele. Jalpy, sot qyzmetiniń túpki nátıjesi, túpki ónimi dep aıtýǵa bolady - ol sot sheshimi. Sot sheshimi qandaı bolýy kerek. Onyń mazmuny, onyń stılıstıkasy, qurylymy, tili qandaı bolýy tıis? Kóp jaǵdaıda sot sheshimin azamattar túsinbeıdi. Nege túsinbeıdi? Óıtkeni, olar óte qıyn, óte kúrdeli tilmen jazylǵan. Sodan keıin kóp jaǵdaıda qaralyp jatqan máselelerge qatysy joq artyq aqparattarmen sheshimderimizdi toltyryp tastaımyz. Sodan keıin ony qoldan kólemin ulǵaıtamyz. Árıne, qarapaıym adam ondaı kásibı «jargon», tilimen jazǵan sózderdi túsine bermeıdi», - dedi Jaqyp Asanov QR Joǵarǵy sotynyń búgingi jalpy otyrysynda.

Onyń aıtýynsha, kóp jaǵdaıda azamattar: «Biz ózimizdiń aryzymyzda óz ýájderimizdi jazamyz. Biraq, sottyń sheshiminde árbir ýájge jaýap joq» dep jazatynyn aıtady.

«Ekinshiden, qurylymy da túsiniksiz. Ne ınterval joq, ne abzats joq. Qateler kóp. Endi árbir sheshimdi ol sýdıanyń atynan, Qazaqstan Respýblıkasynyń atynan shyǵaramyz. Úshinshiden, maıda shrıftti oqý múmkin emes. Adamnyń kózi aýyrady. Tórtinshiden, sýdıa sheshimin jazady, shyǵarady, qabyldaıdy, jarııalaıdy. Sot zalynda jarııalaıdy da, birden ketip qalady. Eshkimge túsindirmeıdi. Túsinbegen soń azamattar «zańnyń tilimen shatastyryp, bizdi aldap soqty» dep ókpeleıdi. Sodan keıin barlyq satyǵa aryzdaryn jaýdyrady», - dedi ol.

Jaqyp Asanov osy sebepti naqty sharýalar qolǵa alynǵanyn atap ótti.

«Sondyqtan, bul másele óte mańyzdy. Biz Joǵarǵy sotta búkil óńirlerdiń sottardyń qatysýymen eki aıdaı talqylap jatyrmyz. Búkil múddeli qurylymdar da qatysty. Búgin tıisti normatıvtik qaýlynyń jobasy daıyndaldy», - dedi Jaqyp Asanov.