Jaqynyńdy qorǵaý úshin vaktsına alýdan qorqýdyń qajeti joq – emhana dırektory
ATYRAÝ. QazAqparat – Atyraý oblysynda 1-8 aqpan aralyǵynda «Spýtnık V» vaktsınasyn 833 adam aldy. Onyń ishinde medıtsına salasynyń 794 qyzmetkeri bar. Solardyń qataryndaǵy №7 qalalyq emhananyń dırektory Gúlnafıs Tańbaeva vaktsına saldyrǵannan keıingi óziniń kóńil-kúıi jáne vaktsınatsııanyń mańyzy týraly aıtyp berdi, dep habarlaıdy QazAqparat.
Onyń málimetinshe, №7 emhanada 250-den astam adam jumys isteıdi. Qazir olardyń 10%-dan astamy vaktsına alyp úlgergen.
«Medıtsına salasynda jumys istegenime 25 jylǵa jýyqtady. Osy kezeńde halyqtyń densaýlyǵyn saqtaý, túrli aýrýdyń aldyn alý úshin de, medıtsına isin uıymdastyrýshy retinde de turǵyndarmen tyǵyz baılanys ornatyp kelemin. Óıtkeni, ózge salalarǵa qaraǵanda medıtsına qyzmetkerleri adamdarmen kóbirek aralasady. Sozylmaly aýrýy bar jandar, jalpy turǵyndar dárigerlerge kóbirek júginedi», - deıdi Gúlnafıs Tańbaeva.
Onyń aıtýyna qaraǵanda, pandemııa tirkelgen kúnnen beri halyqtyń dárigerlerge degen senimi arta túsken. Koronavırýs ınfektsııasy dendep, naýqastar qınalǵan sátte aldymen dárigerler kúni-túni migirsiz eńbek etti.
«Qaýipti vırýspen betpe-bet kúresken dárigerler de, orta býyn qyzmetkerleri de ınfektsııa juqtyrdy. Biraq, medıtsına qyzmetkerleriniń mindeti – naýqastyń ómirin saqtap qalý. Árıne, birinshi tolqyn kezinde indetten qorǵaıtyn vaktsına bolmady. Soǵan qramastan, salanyń barlyq qyzmetkeri indetke shaldyqqan jandardyń ómiri úshin kúresti.
Kez kelgen ınfektsııany toqtatýdyń da, onyń aldyn alýdyń da bir joly – vaktsına saldyrý. Vaktsına aldymen ınfektsııadan qorǵaıdy. Sol sebepten, ózim vaktsınany alǵashqylardyń qatarynda aldym. Nege? Óıtkeni, ózimdi, otbasym men aınalamdaǵy áriptesterimdi, emhanalaǵa keletin adamdardy qaýipti vırýstan qorǵaýym qajet. Sondyqtan, jaqynyńa, janyńda júrgen jandarǵa janashyr bolý úshin vaktsına alýdan qorqýdyń qajeti joq», - degen oıymen bólisti Atyraý qalasyndaǵy №7 emhana dırektory Gúlnafıs Tańbaeva.
Dárigerdiń pikirinshe, osy oraıda ár adam qoǵam aldyndaǵy jaýapkershilikti sezinýi kerek. Bul – qaýipti vırýsty taratpaý.
«Bul úshin taǵy da qaıtalap aıtaıyn, vaktsına alýdan qoryqpaı, erikti túrde saldyrǵan jón. Vaktsınadan keıin ózimde de, áriptesterimde de janama áser bolǵan joq. Kúndelikti jumysyma kelip júrmin. Áriptesterim de jumysynan qalǵan joq. Demek, vaktsınanyń adam aǵzasyna keri áseri joq deýge bolady» -deıdi ol.
