Jaqynyńa janashyr bol: Koronavırýs juqtyrǵan naýqastar qandaı jaǵdaıda aýrýhanaǵa jatqyzylady
ALMATY. QazAqparat – Almaty qalalyq Qoǵamdyq densaýlyq saqtaý basqarmasynyń basshysy Kamaljan Nadyrov koronavırýs ınfektsııasy bar naýqastardy aýrýhanaǵa jatqyzý jáne baqylaý mehanızmin túsindirdi, dep habarlaıdy QazAqparat tilshisi.
«KVI jaǵdaıy rastalǵan patsıentterdi emdeýge jatqyzý jáne baqylaý algorıtmine jeke toqtalǵym keledi. Taldaýlary oń nátıje kórsetkende jáne aýrýdyń eshqandaı belgisi bolmaǵan jaǵdaıda tirkelgen jeri boıynsha emhanaǵa, úıden shyqpaı-aq qońyraý shalý nemese Sall-ortalyǵyna 3000-103 nómirine júginýi qajet. Ambýlatorııalyq jaǵdaıdaǵy baqylaýdy MSAK mobıldi brıgadalary kelesi algorıtmge sáıkes júrgizedi: kún saıyn eki ret telefonmen habarlasý; jalpy jaı-kúıin, dene qyzýyn baǵalaý, syrqattaný boıynsha shaǵymdaryn (jótelý, tynys alýdyń qıyndaýy, álsizdik, tersheńdik, dıareıa, bórtpe, mıalgııa jáne taǵy basqa) anyqtaý, satýratsııa (múmkin bolǵanda); qajet bolǵan jaǵdaıda úsh kúnde bir ret beıne-konsýltatsııa júrgizý»,– dep túsindirdi Kamaljan Nadyrov.
Sonymen qatar, ol aýrýdyń sımptomsyz túri bar adamdardy medıtsınalyq baqylaý oqshaýlaýdyń 10-shy kúninde PTR tekserýimen bosatylatynyn aıtty.
«Baqylaý kezeńinde klınıkalyq sımptomdarynyń (dene qyzýynyń kóterilýi, jótel, tynys alýdyń qıyndaýy, entigý) damýy kezinde patsıent juqpaly aýrýlar statsıonaryna jiberiledi. Emdeýge jatqyzýǵa COVID-19 dıagnozy rastalǵan, eger olardyń temperatýrasy 3 kún ishinde 38,5°S bolsa, satýratsııa (qannyń ottegimen qanyǵýy) 95 paıyzdan az bolsa, eki ókpesinde de 25 paıyzdan astam ózgeristeri taralǵan pnevmonııa belgileri bar (KT nátıjeleri bolǵan jaǵdaıda) patsıentter jatady»,– dedi ol.
Onyń aıtýynsha, COVID-19 vırýsy anyqtalǵan, jataqhanada, adamdar kóp qonystanǵan páterde turatyn nemese 65 jastan asqan táýekel tobyna kiretin adamdar da aýrýhanaǵa jatqyzylýy tıis.
«Taǵy da aýrýhanaǵa jatqyzý algorıtmine nazar aýdarǵym keledi. Eger sizde testiniń oń nátıjesi bolsa, biraq sımptomdar bolmasa, jedel járdem shaqyrýdyń qajeti joq. Sizge emhanaǵa nemese 300-01-03 nómiri boıynsha Call - ortalyqqa habarlasý qajet. Sizdiń aýrýhanaǵa jatqyzý máseleńiz emhana deńgeıinde sheshiletin bolady.Osy jaǵdaıdy paıdalana otyryp, halyqqa jeke karantındik sharalardy qatań saqtaýǵa jáne mamandardyń usynystaryn basty nazarǵa alýǵa shaqyramyn»,– dep qortyndylady K.Nadyrov.
