Jaqynyńa janashyr bol: BQO-da koronavırýs juqtyrǵan 16 adam aýyr halde jatyr
ORAL. QazAqparat – Batys Qazaqstan oblysynda koronavırýsqa shaldyqqan 16 adam aýyr halde jatyr, dep habarlaıdy QazAqparat tilshisi.
Oblystyq densaýlyq saqtaý basqarmasynyń basshysy Bolatbek Qaıýpovtyń brıfıngte málim etkenindeı, óńirde barlyǵy 967 naýqas tirkelse, sonyń 240-y juqpaly aýrýlar aýrýhanasynda emdelýde.
Sonyń altaýy – balalar. 64-i – aýrý belgisi baıqalmaıtyndar, 58-i – jeńil, 102-si ortasha halde.
16 adam aýyr halde bolsa, sonyń tórteýi jasandy tynys alý apparatyna qosylǵan. Olardyń bireýi 38, ekinshisi 73, qalǵan ekeýi 60 jasta. Jeti naýqas jansaqtaý bóliminde jatsa, taǵy jeteýi ıntensıvti terapııa palatasynda. Sońǵy kezde aýyr haldegi naýqastar kóbeıip barady. Ásirese, pnevmonııamen syrqattanǵandar sany 53-ke jetti. Olar ottegi maskasyna táýeldi. Ottegi maskasyn kıgen bul naýqastar da barynsha nazar aýdarýdy, tıisti emdi qajet etedi.
Ótken demalys kúnderi 47 naýqas tirkeldi.
«Keıingi kezde adamdar kóshelerge kóp shyǵa bastady. Maska taqpaıtyndar, áleýmettik araqashyqtyqty saqtamaıtyndar az emes. Sonyń saldarynan bir adam aýyrsa, onymen qarym-qatynasta bolǵandar arasynda vırýs ta tez taraıdy. Ásirese, koronavırýs jasy ulǵaıǵan jandar, burynnan aýrýlary bar adamdar úshin qaýipti. Sondyqtan óz jaqyndaryńyzǵa dert juqtyrmaý úshin turǵyndardy shekteý sharalaryn barynsha qatań saqtaýǵa taǵy da shaqyramyz», dedi B.Qaıýpov.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaevtyń málim etkenindeı, koronavırýstyń ótken aptadaǵy ortasha ósimi 2,4 paıyzdy qurady.
Óńirde epıdemıologııalyq ahýal turaqsyz. Aýyrǵandardyń 56 paıyzy – buryn indet juqtyrǵandarmen qarym-qatynasta bolǵandar. Syrqattardyń basym kópshiligi (821-i) Oral qalasynda tirkelse, Aqjaıyq aýdanynda – 5, Bókeı ordasynda – 3, Bórlide – 16, Jańaqalada – 5, Jánibekte – 12, Báıterekte – 39, Qaratóbede – 2, Syrymda – 12, Tasqalada – 30, Terektide – 20, Shyńǵyrlaýda 2 adam aýyrdy. Dert jalǵyz tek Qaztalov aýdanynda ǵana tirkelgen joq.
Syrym, Qaratóbe, Jańaqala aýdandarynda shekteý sharalary engizilse, sondaı-aq Oral qalasynda da keıbir nysandar karantınge jabyldy.
M.Aryspaev 15 maýsymnan bastap engizilgen shekteý sharalaryn saqtaý qajettigin atap ótti.
Eske sala keteıik, budan buryn BQO-da 15 maýsymnan bastap qandaı shekteý sharalary engiziletinin, koronavırýstan qaıtqan qarııanyń aýrýhanaǵa óte aýyr jaǵdaıda túskenin jazǵan bolatynbyz.
