Jaqynyńa janashyr bol: Almatyda COVID-19 juqtyrǵandardyń basym bóligi -jastar
ALMATY. QazAqparat – 15 maýsymdaǵy jaǵdaı boıynsha Almatyda sımptomdarmen 3113, sımptosyz 813 jaǵdaı tirkeldi. 2020 jylǵy 8-14 maýsym aralyǵynda sımptomdarmen 219, aýrý belgisi joq 616 jaǵdaı anyqtaldy. Bul týraly Almaty qalasy Qoǵamdyq densaýlyq saqtaý basqarmasynyń basshysy Kamaljan Nadyrov onlaın brıfıng barysynda málim etti, dep habarlaıdy QazAqparat tilshisi.
«Bir aptada 150 naýqas emdelip shyqty, jalpy jazylǵandardyń sany 2056 adam. Eger aýyrǵan adamdardyń jas shamasyna qaraıtyn bolsaq negizinen jastar arasynda basym. Mysaly, 20-29 jas sanatynyń úlesine juqtyrǵandardyń jalpy sanynyń 36,8%-y keledi, 30-39 jas sanatynyń arasynda – 18,9%, 40-49 jas sanatynyń úlesine – 14,5%, 50-59 jas sanatynyń úlesine – 11,7%, 60 jastan joǵary jáne odan da joǵary egde jastaǵy adamdar arasynda juqtyrǵandardyń jalpy sany 8,1%. Sondaı-aq, balalar men jasóspirimder arasynda tirkelgen jaǵdaılar da bar, 14 jasqa deıingi balalar arasynda – 5,1% jáne 15-19 jastaǵy jasóspirimder arasynda-4,9%»,– dedi ol.
Sonymen qatar, Kamaljan Nadyrov vırýs juqtyrǵandardyń kóbi naýqastarmen baılanysta bolǵandar ekenin jetkizdi. Profılaktıkalyq tekseris kezinde anyqtalǵandar - 56,7%. Sondaı-aq, táýekel toptaǵylardy tekserý kezinde anyqtalǵandar - 33,9%, óz betinshe tekserilgender – 9,4%.
