Jaqynda ulttyq arnadan «Qazaqtyń júz áni» atty jańa ulttyq joba efırge shyǵady

«Joba táýelsizdigimizdiń 20 jyldyq mereıtoıyna arnalǵan. Búginde qazaq ánine arnalǵan jobanyń qajettiligi zor ekeni sózsiz. Osyǵan baılanysty bul habar Qazaqstan ulttyq arnasy basshylarynyń ıdeıasymen jasalyp otyr. Baǵdarlama 26 aqpannan bastap, apta saıyn, ár jeksenbi kúnderi saǵat 19.00-de shyǵatyn bolady. Habar - 90 mınýttyq. Formaty shoý janrynda, telekórermenderdiń tikeleı qatysýmen birneshe baǵytta órbıtin bolady. Birinshiden, júzdikke enetin úzdik shyǵarmalardy tańdaý kórermen talǵamyna berilse, ekinshiden habar ıntelektýaldyq saıys retinde ótedi. Qatysýshylar qarapaıym kórermen emes, qorytyndy júzdikke enetin shyǵarmalardy tańdaıtyn jandar bolady. Ár kórermen ánniń taǵdyryn sheshetin adamdar bolǵandyqtan, biz osyǵan deıin jobaǵa qatysýshylardy arnaıy kastıngten ótkizdik, qazaq ánderiniń tarıhyn jaqsy biletin, án aıtýdy jany súıetin adamdardy iriktep aldyq. Al habarǵa ánderdiń iriktelýine kelsek, alǵashqy kezeńde qazaqstandyqtar ózderiniń súıikti ánderin uıymdastyrý alqasyna jiberdi. Arnaıy mýzykalyq redaktsııada osy ánderdiń ishinen jıi oryndalyp júrgen 200-den asa tanymal ánder iriktelip alyndy. Sol ánderdi zertteı otyryp, uıymdastyrýshylar óleńderge baılanysty suraqtar daıyndady. Bul tizimge 19 ǵasyrdan búgingi kúnge deıingi «jeńisti» ánder qamtyldy, Abaıdyń jáne basqa da klassıkterdiń halyq ánderine aınalyp úlgergen shyǵarmalarynan bastap keńestik kezeń men zamanaýı shlıagerlerge deıingi ánder kirdi dese bolady. Aıta keterlik jaıt, mádenı muramyzǵa aınalǵan ánder halyq jadynda qalǵanymen ánniń tarıhy men taǵdyry jaıynda aqparatty jınaý ońaıǵa soqpady. Degenmen de joba barysynda jınalǵan qor teńdesi joq mádenı muramyzǵa aınalary sózsiz», - deıdi habardyń mýzykalyq jetekshisi Saǵatbek Qalıev.

Onyń aıtýynsha bul mýzykalyq habar batystyq órkenıettiń shyrmaýynda qalyp bara jatqan óskeleń urpaqqa áýezdi halyq ánderimen, onyń tarıhymen tanystyrýǵa yqpal etip qane qoımaı, kórermenderdi umyt bolyp bara jatqan súıikti ánderimen qaıta qaýyshtyrmaq.

Saǵatbek Qalıevtiń aıtýynsha, jobanyń sońynda halyq talǵamynyń tarazysyna túsip, iriktelingen 100 án SD jáne DBD jınaq bolyp jaryqqa shyqpaq.

Atalmysh jobanyń prodıýsseri Dınara Adamnyń aıtýynsha, sahnalyq túsirilim alańy sońǵy úlgidegi zamanaýı tehnıkalarmen jabdyqtalǵan. «Án muramyzdy nasıhattaýǵa arnalǵan ulttyq dúnıe bolǵandyqtan, eń ozyq televızııalyq jáne shoý tehnıkalardy qoldanýdamyz, sapaly, joǵary deńgeıli habardy jasaý bizdiń mindetimiz, sondyqtan da bul jobaǵa shet eldik áriptesterimiz de tartyldy. AQSh pen Germanııadan álem juldyzdary ǵana qoldanatyn 40 tonnaǵa jýyq shoý-qondyrǵylar ákelindi. Bul álemdik deńgeıdegi qondyrǵylar men kásibı mamandardyń qoıylymdary mádenı muramyzdyń kórinisin aıqyndata túsedi dep senemin», - dedi ol.

Baǵdarlama jazǵa deıin jalǵaspaq.