Jaqynda túrmeden shyqqan Lılııa Rah beıneúndeý jarııalady
ALMATY. QazAqparat - Adam urlady dep aıyptalyp, jaqynda ǵana bostandyqqa shyqqan Lılııa Rah qazaqstandyqtarǵa beıneúndeý jarııalady, dep habarlaıdy QazAqparat tilshisi.
Beıneúndeý feısbýk áleýmettik jelisinde jarııalandy.
«Úıdemin, balalarmen, bárińizben birgemin. Men endi baqyt degenniń ne ekenin bilemin. Men maǵan senip, olarmen birge qalmaı, úıge oralýyma tilektes bolǵan jandardyń barshasyna alǵys aıtamyn. Men adamdardy súıemin, súıip kelgenmin. Maǵan bul kómektesken de shyǵar», deıdi Lılııa Rah.
Sonymen qatar, ol otbasyna jáne qorǵaýshylaryna da alǵysyn bildirdi.
Eske sala keteıik, 2017 jyldyń 26 qańtarynda Apellıatsııalyq sot alqasy Almaly aýdandyq soty shyǵarǵan basty sot úkimin ózgertip, Lılııa Rahty qylmystyq jaýapkershilikten bosatqan bolatyn.
«Almaty qalasy Almaly aýdandyq sotynyń 2016 jyldyń 10 qarashasynda shyǵarǵan Lılııa Rah, Mırı Paz, Baqyt Shalbaev, Islam Mısırovqa qatysty Úkimi ózgertilsin. Lılııa Rahqa qatysty sot Úkimi QR QK-niń 2-baby 68-bóligi boıynsha taraptardyń medıatsııa tártibi arqyly tatýlasýyna baılanysty ózgertilip, dereý bosatylsyn», - dedi sýdıa Qaramanov.
Aıta keteıik, Baqyt Shalbaev pen Islam Mısırovqa qatysty jaza taǵaıyndaý boıynsha sot Úkimi ózgerissiz qaldyryldy. Sot Mırı Pazǵa qatysty sot jábirlenýshiniń jaza taǵaıyndaýdy kúsheıtý boıynsha talabyn qanaǵattandyrmaı, basty sot úkimin ózgerissiz qaldyrdy. Sonymen qatar, sot sottalýshylardyń múlkin tárkileýge qatysty sot úkimin toqtatty. Apellıatsııa alqasy Mırı Pazdyń jábirlenýshi Sývanovtyń ózin qylmystyq jazaǵa tartý jónindegi ótinimin qanaǵattandyrýǵa negiz joq ekenin aıtty. Óıtkeni Paz Sývanovty jalǵan kýálik berdi dep aıyptaǵan bolatyn.
Eske sala keteıik, 2016 jyldyń 10 qarashasy kúni sot úkimimen Lılııa Rah QR QK 125-babynyń 2-bóligi, 1, 8-tarmaqtaryndaǵy qylmysty jasaǵany úshin (jeke maqsattary úshin adamdar tobymen aldyn ala sóz baılasa otyryp adam urlaý) aıypty dep tanylyp, 7 jylǵa bas bostandyǵynan aıyrylǵan bolatyn. Іske qatysty aıyptalýshylar: Paz, Shalbaev jáne Mısırov QR QK 125-babynyń 2-bóligi, 1, 3, 8-tarmaqtaryndaǵy qylmysty jasaǵany úshin (adam urlaý) kináli dep tanylǵan. Sot úkimimen Paz 7 jyl 6 aıǵa, Mısırov pen Shalbaev árqaısysy 8 jylǵa sottalǵan. Belgili kásipker Lılııa Rah 2016 jyldyń 27 shildesinde Almatyda tutqyndalǵan edi.
