Jaqynda premera - «Kún saqshylary»!
ASTANA. 20 qyrkúıek.t QazAqparat - 1 qazannan «El arna» telearnasynda «Kún saqshylary» serıaly kórsetile bastaıdy. Osy oraıda nazarlaryńyzǵa serıaldyń resmı treılerin usynamyz. Bul mıstıka men dramanyń, tanymal akterler men erekshe ıntererdiń, tańǵajaıyp oqıǵalar men kólkósir sezimniń «kokteıli» bolady dep ýáde beremiz. Dál osy serıal «Habar» Agenttigi men «El arna» telearnasynyń jańa maýsymdaǵy jarqyn baǵdarlamalarynyń legin jalǵastyrady.
Joba avtory -talantty jas rejısser Ahat Ybyraev («Ańyz kitaby: Qupııaly orman», «Sanjar men Qaısar», «Núrkenovter otbasy», «Aınalaıyn»). Rejısser retinde áıgili Lı Strasberg teatr jáne kıno ınstıtýtynyń (Nıý-Iork) túlegi Sanjar Sultanov («Ýaqyt kútpeıdi», «Haker») shaqyryldy. Stsenarıı avtorlary - Valerııa Plotnıkova men Rýstam Nııazov. Bul men «Habar» Agenttigi men «El arna» telearnasynyń zamanaýı shytyrman janrdaǵy jobasy bolmaq..
Ahat Ybyraev kafelerdiń birinde tústik iship otyrǵan kezinde osy serıaldyń ıdeıasy týyndaǵan eken. Ol tańtamasha oqıǵalarǵa tap bolyp, aqyrynda qazyna taýyp alatyn meıramhana qyzmetkerleri týraly fılm túsirýdi uıǵarady.
Serıalǵa Nurjan Tutov, Arýjan Jazylbekova, Artýr Tólepov, Sharip Serik, Rýstem Janamanov, Juldyz Mahanova sııaqty belgili akterler qatysqan.
Serik Abas-shah, «El arna» telearnasynyń dırektory:
«Bul serıal qazaqstandyq jastarǵa jáne otbasylyq aýdıtorııaǵa qyzyq bolady dep senemiz. «Kún saqshylarynda» adamdar arasyndaǵy qarym-qatynas máseleleri men mahabbat taqyryby kóteriledi. Ereksheligi - qanyq boıaýlary men pálsapalyq quramy. Biz aldyna maqsat qoıý men adal, eńbekqor bolýdyń mańyzdylyǵyn basa aıtqymyz keledi. «Kún saqshylary» «El arnadaǵy» serıaldar legin jalǵastyrady, jáne bul - kórermenderge daıyndaǵan syılyǵymyzdyń sońǵysy emes».
Ahat YBYRAEV, prodıýser:
«Serıaldyń maǵynasy «Sen de bir kirpish dúnıege, Ketigin tap ta, bar, qalan» degen joldarǵa keledi. Bizde bul oı kafeniń astynda qazyna jasyrylǵan degen metaforadan kórinis tapqan. ıAǵnı ár adam qazynany shetten emes, óz ishinen izdeý kerek, ózińnen qashýdyń qajeti joq degendi aıtqymyz keledi.
Bul - kadr syrtynan kúlki estilip turatyn sıtkom emes, bul jaýapsyz mahabbattan japa shegip júrgen dárigerler men muǵalimder týraly drama da emes, ıdeologııalyq novella deýge de kelmeıdi. Qazir kórermenderge elden erekshe keıipkerler qyzyq. Óıtkeni qazirgi aqparattyq aǵyn adamdardy esinen tandyrýda. Kóbi óz ornyn taba almasa da, baı, dáýletti bolǵysy keledi. Osy joba úshin sonaý Kanadadan rejısser Sanjar Sultanovtyń arnaıy kelgenine qýanyshtymyn, onyń tájirıbesi serıaldyń jandy shyǵýyna septesetini anyq. Bul ıdeıany «Habar» Agenttigi qoldap, «El arnanyń» kórermenderine usynǵanyna rızamyn».
Sanjar SULTANOV, rejısser:
«Kanadada men prodıýser, stsenarıst retinde kóbirek jumys isteımin, ıaǵnı uıymdastyrýshylyq máselelerge kóbirek aralasamyn. Bul serıalǵa meniń tarapymnan jańashyldyq qana talap etildi. Maǵan tolyqmetrajdy jumystar qyzyǵyraq, biraq serıal janrynda da baq synap kórý qyzyqty. Maǵan jalpy qazaq kınematografy qyzyq. Óıtkeni meniń Otanym osynda. Bizdiń serıal jastarǵa arnalǵan, túrli salalar men túrli otbasylarynan shyqqan túrli adamdar týraly. Al maǵan ylǵı da mýltıulttylyq ıdeıasy unaıtyn, sondyqtan bul joba barysynda rahattanyp jumys istedim».
«Kún saqshylary» serıalynda jas aktrısa Arýjan Jazylbekovanyń basty rólderdiń birin oınaıtynyn aıta ketý kerek. Ol úshin bul - «Sanjar men Qaısardan» keıingi ekinshi qazaq tilindegi joba. Ol qazaq tilin úırene túsip, tilin túzeýge týra kelgenin jasyrmaıdy. Biraq onyń aıtýyna qaraǵanda, týǵan tilimizde oınaý qajet jáne qyzyq ýaqyt keldi. Aıtpaqshy, jaqynda ǵana Arýjan Jazylbekova men Ahat Ybyraev shańyraq kóterdi.
Arýjan Jazylbekova, basty rólderdiń biri - Tomırıs rólin somdaýshy:
«Men aýqatty adamdardyń qyzyn oınaımyn. Ol anasynan aıyrylǵan soń óz betimen ómir súre alatynyn dáleldeýge tyrysady. Árıne, birden isi ońǵa baspaıdy. Ol iri kompanııalardyń birine emes, kafege, daıashy bolyp ornalasady. Aqyrynda ol sol meıramhanaǵa marketolog bolyp, túrli bıznes-ıdeıalarmen jumys isteıdi. Bizdiń serıaldan jastardyń kóbi ózin tanıdy. Biz ylǵı da birdeńe izdep júremiz, biraq taba alamyz ba?..»
Jarqyn dıalogtar, shynaıy sezimder men azdaǵan mıstıkany bir serıaldan kórgińiz kele me? Endeshe, «El arnadan» 1 qazannan bastap 22.10-da «Kún saqshylarynyń» premerasyn jiberip almańyzdar.
