Jaqynda mektep bitirgen túlek ınternet-alaıaqtyqqa qatysty kúdikti retinde ustaldy - SQO
ASTANA. QazAqparat - Petropavl qalasynyń polıtseıleri almatylyq ınternet-alaıaqty ustady, dep habarlaıdy QazAqparat tilshisi SQO ІІD baspasóz qyzmetine silteme jasap.
Vedomstvodan habarlaǵandaı, Petropavl qalasy ІІB qylmystyq polıtsııa qyzmetkerleri Almatyǵa arnaıy baryp, kúdiktini qolǵa túsirgen. Ol - jaqynda ǵana mektep bitirgen almatylyq turǵyn bolyp shyqty.
«Petropavl qalasynyń turǵyny arzan aıfon satyp almaq bolǵan. OLx.kz jelisindegi tegin habarlandyrýlar portalynda ol 25 myń teńgege aıfonnyń satylatynyn kóredi. Talap boıynsha aldyn-ala qiwi-ámııan arqyly 20 myń teńgeni aýdarý kerek bolǵan. Petropavldyq aqshany aýdarǵanymen, satýshynyń nómiri óship qalǵan», - delingen habarlamada.
Belgili bolǵandaı, alaıaq ózin vırtýaldy kásipker retinde tanystyrǵan. OLx.kz jelisiniń saıtynda ol fırmalyq taýarlardy arzan baǵada usynatyn paraqsha ashyp alǵan. Jeke kýáliginiń kóshirmesin jibergen kezde satyp alýshy aldanyp qalsa kerek. Al jeke kýáliktiń kóshirmesin alaıaq ınternetten júktep alǵan. Mine, osylaısha, alaıaq bóten adamdardyń jeke kýáliginiń kómegimen óziniń qylmystyq pıǵylyn iske asyrǵan.
«Atalǵan «fırmadan» qansha adamnyń aldanǵanyn áli anyqtaýǵa týra keledi. Qazir atalǵan is petropavldyq polıtseılerge berilgen. Qylmystyq kodekstiń «Alaıaqtyq» baby boıynsha jaýapqa tartylǵan kúdiktiniń qylmysy dáleldengen jaǵdaıda ol 4 jylǵa deıin bas bostandyǵynan aıyrylýy múmkin», - delingen habarlamada.
