Jaqynda «Qazaq eli» telehıkaıasy bastalady
ASTANA. QazAqparat - Naýryz aıynda 31 arnadan rejısser Rústem Ábdirashtyń kópten kútken «Qazaq eli» telehıkaıasyn tamashalaı alasyzdar. Fılmniń ıdeıa avtory - Prezıdent Nursultan Nazarbaev kınematografııa arqyly memleketimizdiń qurylý tarıhyn baıandaǵan, dep jazady Massaget.kz.
Fılmniń stsenarııin belgili jazýshy Smaǵul Elýbaı, Tımýr Jaqsylyqov jáne rejısser Rústem Ábdirash birigip jazǵan. Al negizi Іlııas Esenberlınniń «Kóshpendiler» trılogııasynyń birinshi bóliminen alynǵan.
Altyn Orda ydyraǵannan keıin, ıaǵnı HV ǵasyrda Qazaq handyǵynyń qalyptasý tarıhy telehıkaıanyń ózegin quraǵan. Fılmniń sıýjeti boıynsha Qazaq handyǵyn qurýshy Kereı men Jánibek halqynyń múddesi jolynda elge ústemdik júrgizýdi maqsat tutqan ozbyr han Shaıbanshahpen taıtalasqa túsedi. 1457 jyly Syǵanaq mańynda bolǵan oırattarmen shaıqasta jeńilis tapqan Shaıbanshah olarmen bitimgershilikke keledi. Alaıda kóshpendi halyqty ýysynan shyǵarmaý úshin aıaýsyz saıasatyn júrgizýdi toqtatpaıdy. Hannyń ozbyrlyǵyna tóze almaǵan Kereı men Jánibek oǵan qarsy shyǵyp, mańaıyndaǵy ulys-taıpalardyń basyn qosyp, Moǵolstan shekarasyna (qazirgi ońtústik-shyǵys Qazaqstan aýmaǵy) kóship ketedi de, sol jerde jańa handyq boı kóteredi.
Telehıkaıa qazaq tilinde túsirilgen, alaıda fılmde shaǵataılar men jońǵarlardyń óz tilinde sóıleıtin sátteri de bar. Akterlerdiń basym bóligi - qazaqstandyq óner maıtalmandary, sonyń ishinde Qarlyǵash Muhammedjanova, Doshan Joljaqsynov (Ábilqaıyr Shaıbanshah), Erkebulan Daıyrov (Jánibek han), Qaırat Kemalov (Kereı han), Aıan Ótepbergenov, Bekbolat Tileýhan jáne basqalar. Ózbek hany Ábilqaıyr Shaıbanshahtyń báıbishesiniń rólin Qytaıdan kelgen Janar Saǵat somdasa, oırattardyń bıleýshisi Óztemir taıshynyń rólin mońǵolııalyq akter somdap shyqqan. Esimi ańyzǵa aınalǵan abyz Asan Qaıǵy oqıǵalardy jyryna qosyp, hıkaıany baıandap otyrady.
Hıkaıada qazaqtardyń kóshpendi ómiri, urystar men shaıqastar keńinen kórinis tapqan. Tek bir ǵana kóshtiń ózine 200-den asa adam, 150 at, 10 túıe jáne «Nomad» kaskaderler tobynyń kásibı kaskaderleri qatystyrylǵan. Telehıkaıa túsirilimine QR Qorǵanys mınıstrligi óziniń atty áskerin usynǵan. Sondaı-aq romantıkalyq kórinister de óz ornyn tapqan. 10 bólimnen turatyn jobanyń qarajatyna kelsek, bir bóligi halyq qarajatynan, endi bir bóligi demeýshilerdiń qarajatynan alynsa, negizgi qarjy memlekettiń ózinen bólingen.
