Jaqynda Almatyda «Altyn Júrek» júldesiniń ıegerleri belgili bolady
ALMATY. 11 qazan. QazAqparat /Názıra Eleýhan/ - Almatyda 27 qazan kúni qaıyrymdylyq salasy boıynsha júregi keń jandardy marapattaıtyn «Altyn Júrek» syılyǵynyń ıegerleri belgili bolady. Bul týraly búgin Almatyda ótken arnaıy baspasóz máslıhatynda aıtyldy.
Esterińizge sala ketsek, Ortalyq Azııada balamasy joq «Altyn Júrek» syılyǵy bıyl Qazaqstanda besinshi ret uıymdastyrylatyn bolady. Jobanyń maqsaty - atymtaı jomarttar men keń peıil jandardy marapattaý, qoǵam atynan alǵys aıtý bolyp tabylady.
«Aldyńǵy tórt jylda 10 atalym ózgerissiz keldi, al bıyldan bastap biz Qazaqstan aýmaǵynda qaıyrymdylyqpen aınalysatyn sheteldik azamattarǵa beriletin jańa syılyqty - «Qazaqstannyń órkendeýine qosqan úlesi úshin» atalymyn qosyp otyrmyz. Bul qazaq jerinde jaqsylyq jasaýǵa yntaly sheteldik azamattardyń sany artyp, tıisinshe muqtaj jandar sany azaısa degen nıetten týyndady»,-dedi «Altyn Júrek» syılyǵy uıymdastyrý komıtetiniń tóraıymy Juldyz Omarbekova.
Onyń aıtýynsha, jyl saıyn syılyq úmitkerleriniń sany artyp keledi. «Máselen, alǵashqy jyly 70 ótinish qabyldansa, keıingi jyldary olardyń sany 90, 110, 150 boldy. Osy jyly qujattardyń sany 200-ge baryp jyǵyldy. Alaıda keıbir úmitkerlerdiń qujaty tolyq bolmaǵandyqtan, sarapshy keńestiń nazaryna 150 úmitkerdiń ótinishteri men qujattary usynyldy. Eń kóp ótinishter «Jyldyń qaıyrymdy adamy» men «Bilimdi damytýǵa qosqan úlesi úshin» atalymdary boıynsha tústi. Aldyńǵy jyly qatysýshylardyń kóbi elimizdiń Shyǵysynan bolsa, bıyl Ońtústik Qazaqstan men Almaty oblysy jomart jandar sanymen maqtana alady»,-dedi ol.
Uıymdastyrýshylardyń aıtýynsha, 5 jyl ishinde orta jáne shaǵyn kompanııalar - jetimder men múgedek jandarǵa, sport pen medıtsınaǵa kóbirek kóńil bólgen, al iri kompanııalar men ulttyq korporatsııalardyń deni - saıası partııalarǵa kómektesýmen qatar, jol jóndeý men mekeme salýǵa ynta tanytqan.
