Jaqynda áleýmettik tapsyrysqa ózgerister engizý týraly zań jobasy qabyldanady - Ǵ.Telebaev
MATY. 9 qyrkúıek. QazAqparat /Erbol Azanbek/ - Áleýmettik tapsyrysqa ózgerister engizý týraly zań jobasy Parlament qorjynynda jatyr. Bul týraly búgin Almatyda ótip jatqan Qazaqstan táýelsizdigine 20 jyl: ÚEU-dyń Almatynyń áleýmettik-ekonomıkalyq damýyndaǵy róli» atty qalalyq ÚEU-dardyń VII forýmynda QR mádenıet vıtse-mınıstri Ǵazız Telebaev aıtty.
QR mádenıet vıtse-mınıstriniń aıtýynsha, atalǵan zań jobasy jaqyn kúnderi qabyldanýy múmkin. «Táýelsizdiktiń 20 jyldyǵy qarsańynda azamattyq qoǵamdy damytýǵa qatysty mańyzdy sharalar júrgizilýde. Atalǵan sharanyń biri osy zań jobasy», -degen ol elimizde azamattyq qoǵamnyń damýy qarqyndy júrgizilip jatqandyǵyn atap ótti.
«Barlyq deńgeıli memlekettik organdar janynda tıisti keńes berý oryndary quryldy. Jer-jerlerde azamattyq forýmdar ótkizilip jatyr. Osy sharalardyń elimizdegi azamattyq qoǵamnyń keń óris alýyna bastama bolǵany sózsiz. Azamattyq forýmdar Qazaqstan qoǵamynyń ózekti máselesin talqylaý, memlekettik organdarmen qatynastyń basym baǵytyn anyqtaý boıynsha dıalog alańy boldy. Óz kezeginde úkimettik emes sektor da jyldar boıy túrli áleýmettik qyzmet kórsetip keledi. Sonyń ishinde turmysy nashar otbasylarǵa áleýmettik qyzmetter men kómek, quqyqtyq keńes berý, salaýatty ómir saltyn nasıhattaý, jastardy patrıottyq tárbıeleý, múgedek, zeınetkerler, kópbalaly otbasylar, jasóspirimderge jaǵdaı jasaý boıynsha olardyń alar orny erekshe»,- dedi Ǵ.Telebaev.
