Jaqynda áleýmettik-ekonomıkalyq damýdyń naqty mindetteri aıqyndalady - Prezıdent
NUR-SULTAN. QazAqparat - Búgin Táýelsizdik saraıyndaǵy ulyqtaý rásiminde Qazaqstan Prezıdenti Qasym-Jomart Toqaev jaqynda áleýmettik-ekonomıkalyq damýdyń naqty mindetteri aıqyndalatynyn málim etti, dep habarlaıdy QazAqparat tilshisi.
«Kelesi mańyzdy baǵyttarǵa basa mán berýimiz kerek. Birinshi baǵyt - halyqtyń tabysyn arttyrý. Turaqty jáne qarqyndy ekonomıkalyq ósim arqyly ǵana bul máseleni sheshýge bolady. Eń aldymen, ósim bizge ne úshin qajet ekenin tereń túsinýmiz kerek. Azamattarymyz óz elinde alańsyz ómir súrip, eńbek etip, urpaǵyn tárbıelep, halqymyzdyń jetistikterine birge qýanyp, maqtan tutýy úshin ekonomıkalyq ósim bolýy tıis. Taıaý arada Úkimettiń keńeıtilgen otyrysynda biz elimizdiń áleýmettik-ekonomıkalyq damýyndaǵy naqty mindetterdi aıqyndaımyz» , - dedi Memleket basshysy.
