Jaqynda 1911 jylǵy sanaqta qazaq halqynyń sany 8 mln. boldy degen derek tabyldy - Smaǵul Elýbaı
ALMATY. Qańtardyń 22-si. QazAqparat /Erlik Erjanuly/ - Asharshylyqtan kóz jumǵan 4 mıllıon qazaqtyń rýhyna arnalǵan birde-bir eskertkish joq.
Bul jaıly keshe, Almatyda tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasyn ázirleý jónindegi jumys tobynyń otyrysynda aıtyldy, dep habarlaıdy QazAqparat.
"Jaqynda 1911 jylǵy sanaqta qazaq halqynyń sany 8 mıllıon boldy degen derek taptyq. Myrzataı Joldasbekov aǵamyz professor Sholoshnıkovtyń Orynborda 1921 jyly shyqqan kitabyn berdi. Onda qazaq halqynyń sany 1911 jyly 8 mıllıon boldy dep kórsetilgen. Buǵan deıin biz alashshylardyń aýyzsha aıtqan deregine súıenetin edik. 1926 jylǵy sanaqta qazaqtyń sany 4 mıllıonǵa bir-aq túsip, qazaq jerinde 1939 jyly qazaq halqynyń sany 29 paıyzǵa jetpeı qaldy. Aldymen demografııalyq apat oryn alyp, sodan keıin rýhanı apat bastaldy. Bul demografııalyq apat bizdiń ulttyq qasiretimiz boldy", deıdi jazýshy Smaǵul Elýbaı. Respýblıkalyq "Memlekettik til" qoǵamdyq qozǵalysy tóraǵasy orynbasarynyń aıtýynsha, jalpy 1921-1922 jáne 1932 jyldary ashtyqtan 4 mıllıon qazaq kóz jumǵan.
